Vihliux hawj daxmeh yw bingh, daxboh Siujvwnz swnh Siujvwnz ninzndaek, laeglemx gai goyizcienz vunz ndaw ranz ceiq insik haenx bae. Vihneix, Siujvwnz daej ngunh gvaqbae lo……

1

Ranz Siujvwnz miz go faexyizcienz ndeu, neix dwg daengx mbanj dan miz go ndeu, ganjfaex gig hung, gij nga de iet ok haenx cungj cw gvaq aenhongh ranz Siujvwnz lo.

Moix bi seizcin, dwg seiz vafaexyizcienz hai va, gwnz nye cungj hai rim va iq hausagsag, hai ndaej mwncupcup.

Daxbuz Siujvwnz dab aendaengq, genfwngz venj aenswx, mbaet vayizcienz, soengq hawj ranznden vunzmbanj. Vayizcienz caeuq mienh doxgyaux, cuengq gwnz aencaengq cwng, cwng cug le, vanq di gyu, raix di youzlwgraz gyaux, gwn daegbied hom.

Moix baez soengq vayizcienz, Siujvwnz cungj caeuq daxbuz caez bae, neix dwg ranz de dan miz yiengh doxgaiq neix ndaej soengq hawj vunz.

Ranz Siujvwnz dwg ranzgungzhoj ndaw mbanj, mwh dingzlai ranz cungj caep ndaej ranzlaeuz, ranz de lij youq aen ranznamh gaeuqgeq haenx youq. Daxgoeng Siujvwnz dai ndaej caeux, daxboh de gauhgauj gauj sam bi lo gauj mbouj ndaej hwnj daihhag, de deng gik aen’uk luenh lo, saekseiz fat bingh ——raen saw couh sik bae, mboujguenj dwg saw de roxnaeuz dwg saw bouxwnq. Boh Siujvwnz mwh daengz nienzgeij aeuyah, dahsau ndaw mbanj mbouj miz saek boux haengj haq hawj de. Daxbuz Siujvwnz gouz hwnj gouz roengz, vih daeglwg ra ndaej lwg bawx ndeu, dwg rog mbanj dah saugeq ga gyad ndeu. Daj aeu ndaej yah, binghbag daxboh Siujvwnz dauqfanj ndei lo, saedceij ndaw ranz hix menhmenh gvaq ndaej swnh lo.

Daxbuz caeuq Siujvwnz gangj gij saedceij haemzhoj doenghbaez. Siujvwnz mbouj maij dingq, de mbouj maij aen ranz neix, cawzliux daxbuz caeuq goyizcienz ndawhongh.

De maij go faexyizcienz neix miz aen yienzaen youqgaenj ndeu, couh dwg doengzhag ndaw ban cungj maij go faexyizcienz neix.

(Gyah Yingj) （1）