Daxmeh mbouj rox saw, hoeng daxmeh couhdwg bonj saw ndeu. Bonj saw neix son gou guh vunz guh saeh.

Daj gou okseiq daengz roxsoq, ndaejgeiq daxmeh cungj dwg baenz ngoenz guhhong, guhhong, lumj aen lwggyangq mbouj rox dingz nei. Ngoenznaengz mbwn caengz rongh, daxmeh couh hwnj congz dwk feiz cawj rek souh hung ndeu, cawj cug le youh bae rap raemx rwed byaek. Rwed byaek ma youh gueng mou, yienzhaeuh cij ndaej bae guh hong swnghcanjdui. Banringz maranz youh ganjgip bae guh hong gij reih ndawranz. Gyanghaemh vanzlij aeu guh reihbyaek、raeng haeux, faeg byaekmou daengj gij hong neix, ciengzciengz guh daengz gyanghwnz.

Gou geiq ndaej ceiq laeg dwg daxmeh gyanghwnz hwnj bya bae dwk fwnz. Mwhhaenx gak gya gak hoh cungj miz fwnzhaz, miz fwnzhaz cij ndaej dwk feiz cawj souh, cawj haeux mou gueng mou. Caen mbouj rox boux mehmbwk bae gyawz miz aen mbei hung neix, gamj youq gyanghwnz hwnj bya bae dwk fwnz, mbouj lau duzfangz ha? Seizneix gou rox lo, danghnaeuz daxmeh gyangngoenz hwnj bya bae dwk fwnz, couh mbouj bae swnghcanjdui ceng goengfaen. Vihliux ciengx bak ciengx ranz, de mbouj lau dai, gyanghwnz lumhlaep hwnj bya aeu fwnzhaz. Aiq neix couhdwg guh daxmeh le maz cungj mbouj lau, ak lumj guk ne.

Daxmeh ciengzciengz son dou naeuz “caeux hwnq sam haet comz baenz ngoenz”. Mwhhaenx daxmeh hozcij dwg hwnq caeux ndwi? De dwg hwnzngoenz guhhong mbouj daengx saek yaep、mbouj rox maz dwg baeg.

Daxmeh aeu ciengx dou 6 boux beixnuengx, cungj dwg aeu hwnq caeux ma laep. Hoeng, coengzlaiz mbouj dingqnyi daxmeh nungq saek sing. De cungj hawj dou yawjraen maqmuengh —— yienznaeuz ndawranz boux guhhong noix haeux mbouj gaeuq gwn, hoeng daxmeh dauqcawq hai reihseng ndaem lwgmaenz、lwgbiek、lwgfaeg caeuq lwggva daengj, hawj dou miz gwn miz daenj.

Daxmeh couh yienghneix baenz bonj saw son dou. Dou doeg bonj saw daxmeh neix majhung, baenz vunz, hix lix baenz gij yienghceij daxmeh —— ngaemgyaeuj gaenx guh, mbouj lau haemzhoj, lauxsaed simsoh, rox suenq rox geq.

A, daxmeh, doeg mwngz, doiq gyoengqdou mizik baenzciuh, docih mwngz!