Byagujyinz lajde miz aen ranzhaz ndeu, ndawranz miz song mehlwg. Daxmeh heuhguh Nungz Sivah, seng lwg Ya’gveiz ngamq ndaej 5 ndwen, gvan de couh dai bae lo. De boux dog daiq lwg hwnj bya dwk fwnz roengz naz guhhong.

Bineix, Ya’gveiz ndaej 12 bi lo, seizcin cix mbwnrengx, geij ndwen cungj mbouj roengz saek dik fwn, gomiuz haeuxyangz deng dak ndaej cadi daireuq liux lo. Vahsug gangj “dem lai faen namh he, noix dai go miuz he”. Song mehlwg couh ngoenzngoenz hwnj bya bae hoh miuz. Yagveiz youq giz seb rin baenz congh baenz congh vat aeu namhbiz, youh baenz canj baenz canj lumx youq goek haeuxyangz. Vat dwk vat dwk, de youq ndaw congh rin vat ok duzgoep hung ndeu. Duzgoep lij “gva gva” hemq dwk. Ya’gveiz heuh naeuz:“Meh! Gou vat ndaej duzgoep hung ndeu, de lij ‘go go’ heuh gou ne!” Daxmeh swnhbak dap naeuz:“Luenhgangj, gyang reih cij miz duzgvej, gyang raemx cij miz duzgoep.” Ya’gveiz nyinhcaen naeuz:“Caen dwg duzgoep hung, mwngz daeuj yawj ne! Ndang de lij lamh miz diuz sai ndeu dem.” Daxmeh lij dwg gyaeuj mbouj ngiengx, fwngz mbouj dingz, nyaengq lumx haeuxyangz, de hozunq naeuz:“Gej diuzsai ok, hawj de bang raeuz gaeb non.” Ya’gveiz gej ok diuzsai le, couh cuengq duzgoep youq ndaw congh rin. Doeklaeng de moix ngoenz bae gyang reih, cungj bae yawj duzgoep gonq, caeuq duzgoep gangj vah, duzgoep hix lumj roxyiuj de gangj nei, aen da luenzlulu yawj coh de, “gva gva” lienz hemq geij sing. Daxmeh raen de gyaez duzgoep lai, couh naeuz:“Haemhneix daiq de maranz ba, ciengx youq ndaw gangraemx.”“Duzgoep duzgoep mwngz ndaejnyi loba! Meh heuh gou daiq mwngz maranz, raeuz ndaej youq giz he lo!”

Seizdoeng bae seizcin dauq va youh hai, Ya’gveiz gaenq ndaej 20 bi lo, de hwet cig mbaq gvangq, maenhvuengh mizrengz, dwg boux caixhangz guhnaz nw. De lij caeuq seiziq doxdoengz, moix ngoenz haeujok cungj caeuq duzgoep camndei doxbiek.

Bineix seizhong, mehlwg de bae gyang reih ciengj sou haeuxyangz, mbwn laep cij maranz. Ya’gveiz cuengq roengz hongdawz le couh sikhaek gaem hwnj diuzhanz, byaij daengz henz gang siengj aeu doiq doengj bae rap raemx. Ya! Gang raemx rimradrad, duzgoep fouz youq gwnz raemx yawj coh de. “Meh, dwg byawz bang raeuz rap raemx ha?” Daxmeh hix mbouj rox. De yaek swiq rek cawj haeux, biengj fa baez yawj, yaihgutgut homfwdfwd, rek haeux rim he gaenq cawj ndei lo. “Ya’gveiz a, mwngz daeuj yawj, miz vunz lij bang raeuz cawj haeux dem!” Song mehlwg roxnyinh geizheih, doq gwn haeux doq cai, ngeix bae ngeix dauq, lij dwg mbouj rox bouxsimndei neix dwg byawz. Ngoenz daihngeih mehlwg lij dwg haetrongh okdou, mbwnlaep maranz. Aen gang、 aen rek youh lumj ngoenzlwenz nei. “Ya’gveiz ha, bouxsimndei neix, raeuz itdingh aeu ra ndaej de, gyo’mbaiq de cij ndaej.”

Ngoenz daihsam, mehlwg youh ciuqyiengh bae gyang reih guhhong. Daengz banringz seiz, Ya’gveiz couh heuh daxmeh maranz gonq lo. Daxmeh byaij daengz bakdou le, diepgaenh gehdou caeg ndomq haeuj ndawranz bae, ha, miz dahsau gyaeundei ndeu cingq caux feiz cawj haeux ne! “Aiyo!” Daxmeh gikdoengh dangqmaz, de doi dou, sam yamq gyoeb baenz song yamq, angqfwngfwng byaij daengz baihnaj dahsau, gaemdawz fwngz de maenhmaenh bae, lumj lau de mbin bae nei. Dahsau bienq ndang siengj ndoj, hoeng gaenq ganj mbouj gib lo, cij ndaej ngaemgyaeuj ndwn youq mbouj gangj vah. Daxmeh youh daj gwnz daengz laj sijsaeq cim dahsau, naeuz:“Dahsau ha, mwngz caen ndei ha! Ranz mwngz youq gyawz, coh mwngz heuhguh maz?” “Gou mbouj miz ranz, couh heuh gou guh Dahcing ba!” “Dahcing! Aen coh neix caen ndeidingq. Haemhneix mwngz youq ranz gou gwn caeuz ba. Caj lwg gou Ya’gveiz dauqma, lij aeu ndeindei gyo’mbaiq mwngz ne!”

Banhaemh, Ya’gveiz ngamq hamj haeuj gamxdou couh yawjraen miz dah sau najseng he cingq caeuq daxmeh gangjgoj. De mbouj ndei gauxca, din mbaeu fwngz mbaeu byaij daengz henz gangraemx bae, “Yi! Duzgoep diuq bae gyawz la?” De youh sijsaeq bae seiqhenz gangraemx ra, lij dwg mbouj raen. “Meh, duzgoep ne?” “Ya’gveiz a, vaiq daeuj raennaj Dahcing, couhdwg de bang raeuz rap raemx cawj haeux ne!” Ya’gveiz caeuq Dahcing raennaj seiz, de roxnyinh lwgda Dahcing gig sug, lumj youq gyawz raen gvaq nei, hoeng youh siengj mbouj ok dwg youq gyawz raen gvaq.

（caengz sat）