Miz ngoenz gyanghaet nditrongh he, saehaexmax yaek hwnj gwnz faex hung mwncup bae dak ndit.

Saehaexmax numqndwtndwt raih ok ranz daeuj, de yawjraen roeghenj cingq youq gwnz faex angqvauvau ciengqgo. Saehaexmax naeuz: “Roeghenj saundei, banhaet ndei.” Roeghenj naeuz: “Mwngz ndei, saehaexmax, mwngz yaek bae gizlawz ha?” Saehaexmax naeuz: “Gou yaek hwnj gwnz faex bae dak ndit.” Roeghenj bekbek gaiqfwed de naeuz: “Gyayouz, gou siengsaenq mwngz itdingh hwnjbae ndaej!” Saehaexmax angq dwk naeuz: “Gyo’mbaiq mwngz, roeghenj.”

Saehaexmax laebdaeb raih hwnj gwnz bae, de gaenq hanh rih roenroen, cix mbouj haengj yietnaiq. Saehaexmax laebdaeb roengzrengz, raih dwk raih dwk, de menhmenh raih daengz gwnz faex hung lo. De yawj gwnzmbwn lamzyubyub, dujfwj hausagsag, gofaex mwncupcup, go’nywj heuswdswd, angq lai lo!

Saehaexmax doenggvaq swhgeij roengzrengz, yawjraen funghgingj gyaeundei, hix gyau ndaej le baengzyoux ndei.

(Huzbwz Swngj Vujhan Si Cinghsanh Gih Ganghvah Siujyoz ngeih nienzgaep Yangz Hauhih)