Seizhah, ndithaemh ndingrongh, duzbid hemqgedged, heiq go’ngaeux homfwdfwd. Henz daemzngaeux naengh miz buz laux caeuq lwg nyez ndeu, geq va’gaeux ndaw daemz.

“Daxbuz, daxbuz, yawj gizhaenx, rongzcehngaeux!” Gou iet ok lwg- fwngzyinx bizbwd, vix rongzcehngaeux heuswd yaek roz youq gyang va- ngaeux haenx. “Ae！Lij dwg mwngz dasoem!” Daxbuz lumh aen’gyaeuj gou, nyaeuq gokda de aenvih riu nyaeuq engq na lo. “Daxbuz,” gou youh naeuz, “gou aeu gou aeu!”“Mbouj ndaej, baeg lo, mbouj ndaej!” Gou mbouj cingznyienh dwk mbeuj aenbak. “Daxbuz, gou aeu!” Gou lij gaengqgat dwk naeuz. “Lwg ien’gya neix!” Daxbuz fouznaih dwgrengz dwk daemx gyaeujhoq ndwn hwnjdaeuj, byaij bae coh haenzhamq aen bo lingq ndeu.

Ndwn youq dingj bo, yawjraen daxbuz maeuq roengzdaeuj rod coh baihlaj, rod roengz henz daemz bae. Gizde namh cumx myag lai, de baez mbouj haeujsim, couh vaiqvet gyod doxroengz, cung roengz raemx bae. Ndwn youq dingj bo, gou lumj boux ngoemx nei, gangj mbouj ok vah. Lij ndei, de gaemdawz ganj mbawngaeux ndeu, cij ga ndeu caij roengz raemx bae. Daxbuz siujsim yupyup maeuq roengz, fwngzswix menhmenh soeng ganj mbawngaeux, gaem ndaet gij nywj gwnz bo, song ga daenq coh baihlaeng; lingh fwngz he soeng mbawngaeux ok, baez yamq baez yamq doiq daengz dingj bo. Gou rag gaiq fwngz caepcat uq namh de, ndawsim lij miz di lau. Daxbuz ajngaeb yaep ndeu le youh maeuq roengz, rod coh henz daemz. Gou yawj aenlaeng gungjgoz de, itseiz mbouj rox gangj gijmaz ndei. Youh dwg giz dieg de, gou sim diuqbubbub, yawj- raen de sien gaemdawz ragnywj, yamq ok gaiq ga ndeu, caij maenh le, youh yamq ok lingh gaiq ga. Liz haenzhamq yied daeuj yied gyae lo, doeklaeng de mbaet dip va bae, euj aen rongz- cehngaeux roengzdaeuj.

Caj de doiq hwnj dingj bo, mwh de mbiq rongzcehngaeux dawz cehngaeux ndenq hawj gou, raemxda gou sawqmwh lumj mboqraemx danh okdaeuj nei lae roengzbyoegbyoeg: “Gou mbouj gwn, mbouj gwn cehngaeux lo……” De uet raemxda gou bae, nyaeuq gokda youh na lo, de mbiq caengz naengheu baihrog cehngaeux bae, yut simcehngaeux ok, dawz nohcehngaeux hausag cuengq haeuj ndaw bak gou. Cehngaeux caengz cug gaeuq, miz di saep, hoeng cix dwg cingdiemz.

Gavaq de lij dumz, raemx ndik roengz laeng din gou miz di liengz, hoeng ndawsim gou, cix gig raeujrub.

Daengngoenz doek bya, buz laux ndeu lwg nyez ndeu menhmenh byaij dwk, ngaeuz song de, raezrang- rang……

（Gyanghsuh Swngj Danhyangz Si Vaznanz Sizyen Yozyau Yangh- cauj Vwnzyozse Cungh Swjyin）