Youq ndaw loq, gou vaq baenz diuz dah laecoco ndeu, lae gvaq bya sang, lae gvaq lueg laeg, doeklaeng gou caeuq doengzdoih gou doxcaez comz lae haeuj diuz dahlajdeih he bae.

Gou deng lajdeih laeprau neix at ndaej diemheiq mbouj ndaej, doeng yawj sae yawj ra nditrongh, baez mbouj haeujsim bungq deng ndaek doenghyiengh youh ndaem youh co ndeu. “Doiq mbouj hwnj!” Henz rwz yiengj hwnj sing codaemq ndeu, “bungq deng mwngz caen doiq mbouj hwnj lo.”“Mwngz dwg byawz ha?” Gou byaengq hung lwgda, geizheih dwk yawj de. “Gou dwg rag, rag gomeizgveiq.” Baenzlawz gojnaengz ne? Vameizgveiq geijlai gyaeundei, hoeng baihnaj ndaek doenghyiengh neix youh ndaem youh co. Gou yungh rengz bibi gyaeuj. De lumj yawj ndaej ok gij ngeizngwd gou, couh dawz ndang cab haeuj ndaw namh bae, mboujduenh soengq raemx hwnj gwnz bae. “Va baihgwnz gyaeu lwi?” Caem yaep he le de cam. “Gyaeu, gyaeu dangqmaz.” Ndaw geh laep gou yawjraen de riu ndaej gig angq.

“Mwngz vihmaz mbouj okbae ne? Baihrog miz ndit, miz nywj, miz va…… gyaeu raixcaix.”“Mbouj ndaej, gizneix liz mbouj ndaej gou.”“Mwngz bi’ndwen hwnz- ngoenz cungj youq giz laeprau neix, caen mbouj goengbingz.” Gou hojsik dwk naeuz. “Mbouj miz maz law, dujva gyaeundei, gou couh angq lo.” Gij vah de cungj dwg baenzneix lauxsaed simsoh, gou deng gamjdoengh lo, mbouj ndaej mbouj yungh lwgda boiqfug daeuj yawj de.

Menhmenh dwk, gou daj ndaw loq ndiu daeuj, gij cingzgingj ndaw loq, lij myumjgyumq yienh youq baihnaj gou. Soqlaiz mbouj geiqsuenq doxbeij swhgeij ndaejsaet, neix couh dwg gij cingsaenz rag, rengz rag, cungj cingsaenz dinghdingh gunghawj dwg gig sang gig ndei. Daj ciuhgeq daengz seizneix, daj ndawguek daengz rogguek, geijlai bouxmizmingz haenh gvaq gij gyaeundei dujva, cix lumzlawq rag gova. Rengz rag daemx gij gyaeundei dujva, gou yaek cuengqsing ciengqgo, yungh gij go ceiq ndeidingq daeuj danqciengq rag, ciengqhaenh bouxguhhong lumj rag mbouj okmingz neix, gyoengqde yungh caenh gij rengz swhgeij, vih vunzlai cauh saedceij ndei. Cingq dwg rengz “rag”, cauh’ok gwndaenj vuenyungz vunzlai.

(Gyanghsuh Gauhyouz Vaigozyij Yozyau Sigijfungh Vwnzyozse Cenz Minjvaz)