Gyanghaemh ndwenbet cibngux, Lungz Byauh muengh coh aen ronghndwen, naemj dwk Siu Cuh, nyaenx mbouj ndaej danqheiq hwnj- daeuj, gig maqmuengh ndaej riengz gij rongh daengz bakdou ranz Siu Cuh bae ra de ha.

“Lwg, gaej gwq simnyap lo.” Daxmeh rox gij simsaeh de, ndwn youq baihlaeng de gig unqswnh nai.

“Simnyap yaek dai lo, baenzlawz mbouj simnyap?”

“Dingq gij vah daxmeh, yienz- faenh mehmbwn dingh, dahsau mbanj gyae’gyawj miz moengj, gig vei ra boux beij Siu Cuh lij ndei!”

“Meh, gou gangj gvaq, ciuhvunz neix itdingh aeu de guh yah, mboujnex couh mbouj aeu.”

“Ai, bohmeh de gaengj lai lo, raeuz mbouj deudik ranz de, ranz de fanjdauq yiemz raeuz, mbouj rox daj gyawz miz cungj dauhleix neix!”

“Ranz de baenzlawz deudik raeuz?”

“Hai! Naeuz ranz raeuz vunz noix, geij daih caenh bouxsai dog ndwi, youh naeuz mwngz mbouj miz maz dinfwngz, baenzngoenz gwnndwi youqlag……”

“Haengjdingh mbouj dwg Siu Cuh deudik doenghgij neix.” Lungz Byauh huj ndaej daengx naj hoengzhwdhwd.

“Lij naeuz, cik ga mwngz naeuh lo, aeu yw ndei gonq, mboujnex aiq lah gij doeg hawj bawx bonj- faenh——”

“Luenhngab! Siu Cuh cungj gamj aeu bak sup gij baksieng gou!”

“Dang’yienz, doenghgij neix cungj dwg gyaij, ceiq youqgaenj vanzlij yiemz ranz raeuz mbouj miz geijlai gyadangq, gungzhoj lai lo.”

“Eiqsei couhdwg ranz de mbouj doengzeiq lo?”(caengz sat)