Bineix binghdoeg lah,

Daxmeh raeuz ceiq fanz;

Ngoenz raeuz ok dou ranz,

Meh fanz mbouj rox gangj.

Dangh bohmeh son naeuz,

Aeu daegbied simhai;

Vah gangj boengj gangj lai,

Coenzcoenz nai rox gyaez.

Boux vunz raeuz okseiq,

Ceiq fanz dwg bohmeh;

Daj lij iq daengz geq,

Bohmeh lij yousim.

Ciengx bouxlwg bae rog,

Meh ndangndok gyonj fouz;

Cuengqheiq mbouj doxdawz,

Mbouj ngawz lou diuz mingh.

Seng lwg mbouj yungzheih,

Ndat nit seiz aeu ganq;

Baihde guh hongranz,

Baihneix ganj hongnaz.

Caet nyied haeux dak ndit,

Cib nyied nit youh fwn;

Gonz nywj caeuq gwed fwnz,

Buh donh dumz donh hawq.

Ganq lwg mbouj yungzheih,

Feiq haujlai goengrengz;

Danqheiq youh cengqgengz,

Dwgrengz bouxlawz rox.

Ciengx raeuz hung baenzneix,

Cingzngeih mbouj ndaej lumz;

Ngoenzneix raeuz baenz vunz,

Gaej lumz de bouxlaux.

Raeuz miz cienz miz ngaenz,

Yaek baen hawj meh yungh;

Lwglan dwg meh rungx,

Lumj duza dauq nyamh.

Hung iq dwg bouxlaux,

Ndei nyauq bohmeh raeuz;

Lij youq mbouj doxnaeuz,

Dai cuengq caeuz fouzyungh.

Hauqswnh dwg bonjfaenh,

Haethaemh mbouj ndaej lumz;

Bouxlaux yaek hawj gwn,

Yaek guh vunz roxsoq.