Daj iq daengz seizneix, gou miz haujlai doengzhag, hoeng caeuq gou ceiq ndei, hawj gou ceiq boiqfug couh dwg Siujmingz.

De bineix 10 bi lo, bouxvunz mbouj biz hix mbouj byom, de gig gyaez bang vunz, singqcingz unqswnh, ndigah miz haujlai doengzhag gyaez caeuq de guh baengzyoux.

Miz baez ndeu dwg singhgiz roek, gou caeuq Siujmingz caeuq daxbuz de doxcaez dap banci bae haw. Hwnj ci le, de ra aen diegnaengh ndeu naengh roengzdaeuj, ngamq naengh roengz- daeuj couh dingqnyi de singsang heuh naeuz:“Swhgih, gizneix miz aen ngaenzbau ndeu, mbouj rox dwg byawz lumz youq gwnz diegnaengh neix lo.” Gangj sat couh dawz ngaenzbau byaij hwnj baihnaj bae hawj swhgih, swhgih baez yawj, ndaw ngaenzbau miz caet bak maenz ngaenz caeuq mbaw ci biuq ndeu. Dangseiz daengx ci vunz cungj yaengx fwngzmeh hawj Siujmingz, haenh de dwg boux lwgnyez ndei ndeu.

Lij miz baez ndeu, gyoengq doengzhag gwn ngaiz le, cungj haeuj ndaw gyausiz sij cozyez, cijmiz doengzhag Siujfangh boemz youq gwnz daiz najsaep najmbwng. Siujmingz raen le cam de, yienzlaiz yaek gaujsi lo, de mbouj miz bit, haujlai doengzhag cungj mbouj nyienh ciq bit hawj de, aenvih de bingzseiz cungj gig gyaez ha doengzhag. Siujmingz rox le, sikhaek daj ndaw habbit dawz gonj bit ndeu okdaeuj, ndenq hawj Siujfangh naeuz: “Siujfangh, gou lij miz bit, mwngz dawz gonj bit neix sij ba, geiq ndaej raeuz dwg doengzhag, raeuz aeu doxgyaez doxbang bw!” Siujfangh gaem gvaq gonjbit najmong dwk ngaem gyaeuj roengzdaeuj lo. Gvaqlaeng ndaw ban dou gyoengq doengzhag cungj doxbang, ban dou doeklaeng lij ndaejdaengz “ bangaep vwnzmingz” dem.

Siujmingz gij binjciz de cigndaej gou hagsib, baezlaeng gou hix dang boux lwgnyez ndaej vunz haenh ndeu.

(bouxlauxsae son’gyauq Luz Dunghginz)