Miz ngoenz ndeu, go’nywj heuswdswd, dujva gyaeugigi, gaeqlwg、bitlwg、gvilwg caeuq goeplwg doxiu bae Byayisanh Gunghyenz liuh. Gyoengqde yaep ndeu doxndoj, yaep ndeu gangj gojgaeq……

Cingqdang gyoengqde guhcaemh ndaej angqvauvau, sawqmwh, gwnzmbwn fwj ndaemndwtndwt, byajraez byajmig, raen yienghneix, gyoengqde ganjgip buet ma ranz.

Mwh lohgvaq ranz daxmehmeuz, yawjraen daxmehmeuz ndwn youq gwnz yangzdaiz, gyoengqde caemhsing heuh: “Daxmehmeuz, ciq liengj hawj dou ndaej lwi?” Daxmehmeuz cienq ndang dawz aen liengj ndeu okdaeuj, naeuz: “Gou ngamq miz aen liengj ndeu, sou seiq boux, gou wnggai ciq hawj byawz ne?” Goeplwg yat mbat ndeu, naeuz: “Gou daj iq maj youq ndaw raemx, ceiq maij raemx lo, fwn caiq hung gou hix mbouj lau, aenliengj hawj gvilwg ba!” Gvilwg iet aen’gyaeuj coh baihrog, naeuz: “Mbouj yungh mbouj yungh, gou miz aen’gyap genggwt, fwn rwed baihgwnz di cungj mbouj lau, gou hix mbouj lau fwn. Aenliengj hawj bitlwg ba!” Bitlwg bekbek gaiqfwed de, naeuz: “Mbouj law mbouj law, gou ceiq maij youq ndaw raemx guh’angq, hix mbouj lau fwn, lij dwg ciq hawj gaeqlwg ba!” Daxmehmeuz hai aenliengj hawj gaeqlwg. Gaeqlwg ciep gvaq aenliengj, gamjdoengh naeuz: “Gyo’mbaiq daxmehmeuz, gyo- mbaiq daihgya!”

Couh youq mwhde, fwnhung raixhoho roengzdaeuj, gaeqlwg gang aenliengj daxmehmeuz ciq hawj haenx, angqfwngfwng byaij youq gyang fwn, bitlwg、gvilwg、goeplwg ndaetndi humx dwk gaeqlwg, bingzonj byaij baenaj.

Daxmehmeuz yawj seiq lwg doengzdoih saemh fwn byaij, haenh gyoengqde dwg lwg ndei doxgyaez doxgvensim.

(sam nienzgaep Cuh Youjvwnz)