Seiqgyaiq lwgnyez mwngz mbouj rox! Ndigah——

Cuengq Gaiq Fwngz Laengz De Roengzdaeuj

Youq mwh lwgnyez guh loek, mwngz cungj bae gibseiz gaijcingq de, hoeng mwngz yied gaijcingq, de yied geizheih, “gou guh gienh saeh neix, dauqdaej aiq fatseng gijmaz saeh?” Yienghneix de baez youh baez bae guh, mwngz cix baez youh baez bae laengz de. Gizsaed, danghnaeuz mbouj dwg saeh gvendaengz dailix, mwngz cienzbouh cungj ndaej cuengqfwngz hawj de bae buek, hawj de gyaeuj daemj deng fajciengz le couh rox dauqlaeng lo, hix deng hit lo, de baezlaeng couh mbouj caiq yienghneix guh lo.

Haep Aenbak Sienghaih De Hwnj

Mwh lwgnyez miz baez gaujsi he gauj ndaej ca le, roxnaeuz deng lauxsae miq le, cingj haep aen bakbyom mwngz hwnj, gaej baeh de, hix gaej aeu gij yaez de caeuq lwgnyez wnq doxbeij, nanzdauh de couh mbouj miz giz ndei? Lwgnyez ranz wnq couh mbouj miz giz yaez? Vunz mbouj dwg yienghyiengh cungj ndei, mwngz wnggai dauqngeix mwh mwngz lwgnyez couh mbouj miz seiz lumj de yienghneix? Seizneix de ceiq mbouj siengj dingq haenx couh dwg bakbyom vah baeh sieng vunz, de ceiq siengj dingq dwg gij vah nai de gujli de. Vah ndei coenz ndeu raeuj sam doeng, va doeg sieng vunz loeg nyied ndangj.

Iet Gaiqfwngz Haenh De Okdaeuj

Lwgnyez mwh ma ranz lwnh mwngz de gauj ndaej faensoq gig sang, mwngz mbouj ndaej lumj mbouj miz maz nei han sing “o” ndeu, yienghneix lwgnyez lumj deng rwed bat raemxliengz ndeu nei, simliengz liux. Danghnaeuz mwngz habseiz umj de mbat he, doiq de yaengx hwnj fwngzmeh biujsi haenh de, de ndaej haenh le ndawsim itdingh angq dangqmaz. Caj baezlaeng gaujsi, de itdingh aenvih mwngz haenh de cix engqgya roengzrengz.

Gaej Nyaenx Gij Siengjsiengliz De Bae

Ngoenzsinghgiz daengz lo, wnggai sij ngoenz- geiq lo, mwh de sij bien cozvwnz sij ndaej maxsaenz mbin gwnz mbwn, nanz lijgaij, mwngz gaej ndaq de, minghlingh de caiq dauq sij bien ndeu. Mwngz yaek roxriuj, siengjsiengliz dwg gij dijbauj lwgnyez, noix mbouj ndaej, bouxvunz noix siengjsiengliz, dwg mbouj miz swhsiengj bw. Mwngz lwnh de nyi, mwngz sij ndaej gig ndei, caiq lwnh de, de mbouj ndei dwg gijmaz, dou lwgnyez dingq ndaej rox go.

Seiqgyaiq lwgnyez mwngz mbouj rox, cingj dingqdingq vah ndawsim dou.

(Cuh Cwngzyenz)

（dozcap banjneix daj gwnzmuengx aeu）