“Deng a! ——Deng a! Itdingh aeu coux guh yah, itdingh aeu coux guh yah!” Buzsimjsam doq riu doq ngaekgyaeuj dwddwd, riengz gij vah Lungz Byauh gangj.

“Lwg, mwngz baenzlawz yiengh- neix gangj a?” Daxmeh de bwnda nyaeuq dwk muengh coh daeglwg bonjfaenh, “dang’yienz aeu cingj Buzsimjsam mwngz caenhrengz bae gangj vah ndei, hoeng yienzfaenh dwg seiqgonq dingh, caiq gangj sawmingh Siu Cuh caeuq mwngz mbouj hab geijlai ne……”

“Meh! Haenx dwg canghsuenq- mingh yaek yaeuh vunz aeu ngaenz luenh gangj ndwi——”

“Baenzlawz ndaej yienghneix gangj ne?” Daxmeh de hozhwnj lo, “mwngz dwg yied hung yied mbouj roxsoq lo.”

“Mbouj youqgaenj.” Buzsimjsam doq bang gangj vah, de ndwn hwnjdaeuj bek aek naeuz, “gij saeh neix Simjsam itdingh bang mwngz, haha……”

“Dwg ha, caez baengh mwngz lo.”

Daxmeh Lungz Byauh biengj hwnj vengqbuh, daj ndaw daehbuh mbon ok geij mbaw ngaenz daeuj, oet haeuj ndaw fwngz Buzsimjsam, song boux doi rag dwk byaij ok dou bae.

Lungz Byauh muengh coh gij ngaeuz song bouxlaux, simnyap danq gaemz heiq ndeu, aeu fwngz vad deuz song duz nengznyaen mbin youq henz cim gij baksieng gwnz ga de.

Ngoenz doek ngoenz gvaqbae lo, baez yaep da couh yaek daengz ndwenbet cibngux lo, hoeng Buz- simjsam mbouj daiq ndaej maz siusik ndei daeuj, byawz naeuz ronghndwen yaek luenz vunz hix ndaej angq? Daj Buzsimjsam gangj vah wzwzazaz caemhcaiq cang riu yawj ndaej ok, gij saeh aiq mbouj daiq swnh. Mehmoiz ganvad neix, hix mbouj rox yaek loengh daengz seizlawz, moix gek cibgeij ngeihcib ngoenz yienghneix, couh daeuj ranz Lungz Byauh baez he, gwq gangj di vah mbouj in mbouj humz, cungj mbouj hawj vah dingh. Hoeng moix baez cungj aeu gwn donq ndeu roxnaeuz daiq di doxgaiq ndeu, caiq aeu di cienz dem cij deuz.

(caengz sat)