Sai:

Sam nyied daengz lo gim,

Cosam daengz lo nuengx,

Gag youq sim gag luenh,

Yaek dajsuenq yienghlawz?

Mbwk:

Daengz sam nyied cosam,

Ranzranz bae sauqmoh,

Gou lij youq ranz boh,

Mbouj rox gvaq gizlawz.

Sai:

Ngeih sam nyied mbawraeu,

Yaek aeu gen mbouj raez,

Ngiengxgyaeuj iet hozsae,

Bae aeu lau vunz hah.

Mbwk:

Ngeih sam nyied mbawraeu,

Mbouj aeu de couh geq,

Gou lij youq ranz meh,

Mbouj rox deq bouxlawz.

Sai:

Daengz ndwen ngeih ngeihcaet,

Daengx vunz daet mbawraeu,

Gou muengh nuengx ngaeungaeu,

Seizlawz daeuj guhdoih.

Mbwk:

Daengz sam nyied cosam,

Ranzranz guh haeuxnaengj,

Raen baz mwngz swiq caengq,

Gou naengh mbouj siengj hwnq.

Sai:

Daengz sam nyied cosam,

Ranzranz guh haeuxnaengj,

Meh gou bae swiq caengq,

Daengj(caj) nuengx daeuj hai feiz.

Mbwk:

Yawj mbawraeu dwg da,

Yawj vafonq dwg eiq,

Song raeuz miz cingzngeih,

Seiqgeiq naengj haeuxcid.

Sai:

Mbawraeu naengj haeux ndaem,

Mbaw gyaemq naengj haeux gyaemq,

Song raeuz vunz doengz saemq,

Boux naemj boux couh baenz.

Mbwk:

Mbawraeu naengj haeux fonx,

Vafonq naengj haeux henj,

Song raeuz vunz doengz nienz,

Boux niemh boux cij baenz.

Sai:

Sam nyied bak va hai,

Vunzlai bouxboux maez,

Vah nuengx baenzlai ndei,

Dwk gou fizriegrieg.

Mbwk:

Sam nyied gogo maj,

Va sien dujduj hai,

Lau beix dawz sim lai,

Aiq bae mbaet duj wnq.

Sai:

Sam nyied cosam daengz,

Guh haeuxnaengj haj saek,

Gyaez nuengx cingz gaenq laeg,

Vaiq daeuj daet mbawraeu.

Mbwk:

Rumz raeuj daengz vivaek,

Sim saet lumj mbaj mbin,

Gou dwg vunz naekcingz,

Laemxsim caj beix aeu.

Sai:

Ndwn laj goek goraeu,

Song raeuz youq boux mbiengj,

Faex raeu mwn lumj liengj,

Caen mbouj siengj doxbyag.

Mbwk:

Youq laj goek faex laux,

Baedauq mbouj lumz cingz,

Coenz gangj song baez cim,

Ndawsim naek cingzngeih.