Caj gou majhung le, gou siengj dang boux lauxsae ndeu, aenvih gou roxnyinh son gyoengq siuj baengzyoux doegsaw, dwg gienh saeh vaiqvued ndeu.

Gyanghaet, dou doxcaez bae hag- dangz, dingq duzroeg ciengqgo, angq- vauvau byaij dwk, itloh dingq gyoengq lwgnyez caenciet heuh gou “Vangz lauxsae”, gokbak gou nyaenx mbouj ndaej mbeuj doxhwnj, simcingz engq vaiqvued lo!

Mwh hwnjdangz, gou itdingh yungh sim hawj gyoengq doengzhag gangjgoq, mwh aennaj iq gyoengqde ciensim yawj gou, gou naemj, gijneix wnggai dwg gou moix ngoenz seiz gamjdaengz ceiq miz cingzcik haenx lo.

Banngaiz, dou doxcaez gwn ngaiz homfwdfwd, dox gamduk, yawjyawj byawz mbouj gwnz liux.

Banringz, youq gwnz dangz gaghag, dou doxcaez yawj saw, caez caem youq ndaw haijsaw bae.

Banhaemh, laj ndithaemh, dou gwn sat haeuxcaeuz, youq gwnz cauhcangz youzbyaij, baenz duj baenz duj fwjhaemh, lumj baengzsa mbangmbi hoengzmaeq nei, youq gwnzmbwn mbinfifi.

Mbwn laep le, gyoengq lwgnyez yaek cuengqhag ma ranz lo, gou sij mbouj ndaej caeuq gyoengqde doxbiek, maqmuengh ngoenzcog vaiqdi daeujdaengz.

Daj gou hainduj bae youwzyenz hwnj, gou moix ngoenz mwh ceiq sim’angq couh dwg ndaej lauxsae haenh, dajciengj ceijnem gyaeundei, moix mbaw ceijnem gou cungj yo ndei bae, caeuq daxboh daxmeh okbae hix cawx di, ma daengz ranz ganjgip yo ndaw doengjgvih gou, mbaw ndeu cungj sij mbouj ndaej dawz okdaeuj guhcaemz, cigdaengz coux rim doengjgvih bae. Gizsaed gijneix dwg vihliux gou majhung le dang lauxsae, aeu daeuj dajciengj gyoengq hagseng gou.

Seizneix gou rox lo, caenh dwg soucomz gij ceijnem neix dwg mbouj ndaej guh boux lauxsae ndei bw, gou lij yaek dang boux hagseng ndei, aenvih daengzcog gou yaek guh boux lauxsae maenhndei ndeu!

( sam nienzgaep Vangz Youhyenz)