Ranz gou dwg aen“suendoenghduz”iqet ndeu. Baihndaw miz “duzyiengz daxboh” unqswnh, “duzguk daxmeh” ak youh yak, “duzmou dahcej” gikgyat, lij miz “duzlingz” cabheiq —— gou. Lajneix, gou gaisau cingzgvang“suendoenghduz”ranz gou hawj daihgya nyi.

Daxboh gou lumj duz yiengz unqswnh he. De coengzlaiz mbouj sing hung ndaq vunz, hix mbouj moeb vunz gvaq, couhcinj mwngz guh saeh loek le hix mbouj ndaq mwngz, cungj dwg ndeindei gangj vah. Guh gijmaz saeh cibfaen miz naihsim. Miz baez ndeu, gou miz diuz daez suyoz he mbouj rox suenq, gou simgip lumj duzmoed ndaw rek nei, boemz youq gwnz daiz daejnga’nga. Daxboh dingqnyi singdaej gou, gig geizheih, gvaqdaeuj cam gou daej gijmaz, gou dawz saehcingz daj goek daengz byai gangj hawj daxboh nyi, daxboh dingq le couh son gou guh. Daxboh son gou geij mbat, gou lij caengz rox, daxboh hix mbouj fatheiq, itcig son gou rox le cij cuengqsim byaij bae. Mwngz yawj, daxboh gou gig unqswnh, dwg mbouj dwg lumj duzyiengz ne?

Daxmeh gou couh mbouj yienghneix unqswnh lo, de lumj duz guk ak ndeu, baenz ngoenz swenjyauyau. Miz baez ndeu gwn haeux, gou itcig gangjvah mbouj dingz, daxmeh couh swenj hwnj- daeuj: “Gangj gangj gangj, vah lai gvaq haeux, coegrwz, gwn haeux!”Gij sing daxmeh hung lumj byajraez, lwgda daengx dwk lumj song aen doengzlingz, hwk dwk gou sikhaek haep bak, heiq cungj mbouj gamj ok. Daxmeh youh da liuq daxboh, daxboh cingq yawj soujgih, youh swenjyauyau: “Gwn haeux yawj gijmaz soujgih, soujgih miz baenzlai ndei yawj? De ndaej hawj vunz dungximq lwi?”Hoeng haxbaenh gou ngamq raen daxmeh yawj soujgih ne, langh daxmeh mbouj dwg boux ceiq ak aen ranz neix, gou caeux couh caeuq de euq donq ndeu lo. Ai, daxmeh meh “guk” neix nyex mbouj ndaej ha.

Gangj daengz dahcej gou, gangj de lumj duzmou ndeu, cungj mbouj gvaqbouh saekdi. Baez daengz ngoenzsinghgiz, dahcej couh ninz youq gwnz congz, nyiem soujgih mbouj dingz. Miz baez ndeu, daxboh heuh de roengz laeuz daeuj gwn faenj, de dawz vanjfaenj haeuj ndaw rug, cigciep cuengq youq gwnz daiz, youh laebdaeb nyiem soujgih, gvaq haemq nanz cij siengj hwnj faenj caengz gwn, de gwn faenj liux le hix mbouj swiq vanj, youh laebdaeb nyiem soujgih. Mwh gou haeuj ndaw rug bae, de lij heuh gou bang de swiq vanj dem. Dahcej baenz ngoenz nyiem soujgih caeuq ninz, mwngz naeuz dwg mbouj dwg lumj duzmou nei ne.

Gou ne, lumj duzlingz cabheiq ndeu, baenz ngoenz diuq hwnj diuq roengz mbouj dingz gvaq. Miz baez ndeu, daxmeh cawx fan denz ndeu ma, bonjlaiz fandenz dieb ndaej caezcaez cingjcingj, hoeng gou gikdoengh lai, youq gwnz denz diuq hwnj diuq roengz, doeklaeng deng ndaq donq ndeu, gou couh mbouj angq lo, youh bae gwnz congz daxmeh laebdaeb diuq, diuq gaeuq bae cij dingz youq. Lij miz baez ndeu, gou roengz laj laeuz hen bakdou, roxnyinh miz di mbwq, couh daenj haizrodnae okbae rod guhcaemz lo, doeklaeng, daxboh laihnaeuz lajlaeuz mbouj miz vunz, couh gven dou hwnjdaeuj, caeklaiq daxboh fatyienh gou mbouj youq ranz, sikhaek haidou ra gou, gou cij ndaej haeuj ranz.

Neix couh dwg suendoenghduz ranz gou, aenvih dou beizheiq mboujdoengz, cij dajcauh ok aenranz vuenyungz neix.

(bouxlauxsae son’gyauq Vangz Gveiyangh)