Moix boux vunz seiziq cungj miz dieg guhcaemz angqfaengz nanzlumz ndeu, dieg guhcaemz gou dwg aen bo iq ndeu.

Aen bo iq neix depgyawj goengq bya ndeu, goengqbya miz song bak lai mij sang, bo iq caeuq de doxbeij couh daemq lai lo, ceiq lai miz cib lai mij sang ba. Cingq aenvih de daemq, mbouj lingq, gou boux iq neix couh ndaej soengse baedauq hwnjroengz gwnz bo.

Seizcin, bo iq daegbied nauhyied. Nywj heuyauyau, sawj vunz simcingz sangjswt, va ndingraiz gyaeundei, sawj vunz angqyangz, duzroeg gwnz faex hemq cici caca, ndei dingq dangqmaz. Bo iq mbe ok aenrungj ceiq cwxcaih de, go- nywj heuyau oiqup lumj denzdemh nei unqnem, yaeng’yaeng lumh dwk gou. Gou youq baihgwnz raih ha、ringx ha, baeg le, couh ninz gwnzde, cwxcaih lai lo.

Seizhah, gou ciengzseiz youq laj gofaex yietliengz, laj raemhfaex, gou youq gumz namh he humx gien rin he, caep baenz aensaeuq, baek hwnj nyefaex hung, caiq caeuq gyoengqdoih youq gwnz saeuq dap nyefaex iq, bae mbaet di mbawfaex caeuq makheu iq cuengq youq gwnz nyefaex. Vunzhung lohgvaq, couh dingz roengzdaeuj, gig mizyinx yawj yaep ndeu, yienzhaeuh cam: “Sou guh gijmaz ha?”

“Coemhfeiz cawj doxgaiq gwn.”

“Gwn gijmaz?” Vunzhung daeg- daengq doeksaet cam.

“Gwn byaek caeuq mak!” Gou gaemdawz mbawfaex caeuq makheu iq, gyajcang feihdauh raixcaix gwn dwk.

Vunzhung yawj le, riuhaha byaij bae lo.

Seizcou, bo iq rieg “buh” lo. Nywj heu ciemhciemh bienq henj, daengx bo cungj dwg mbawloenq. Ceiq yinx gou haenx dwg goraeu, mbaw de ndingraiz ndeiyawj raixcaix, saedcaih sawj gou dawzyinx.

Seizdoeng, bo iq saekseiz miz naehau bu rim. Seizde, gou itdingh buet hwnj dingjbo bae, swnh bolingq ringx giuznae roengz bo, giuznae yied ringx yied hung, caiq dawz aen hung ndeu caeuq aen iq ndeu doxdab, gya di mbawfaex、rin iq、nyefaex, boux vunznae he couh ndwn youq gwnz bo iq neix lo.

Gou riengz bohmeh youz gvaq haujlai bya mizmingz, dat sang、 faex baenz ndoeng、fwj heux、raemxdiuqdat…… Bya sang hunghwd, vunz cungj haenhndei. Hoeng gij bya sang hunghwd geizyiemj neix, cungj beij mbouj ndaej aen bo iq neix caenciet, aenvih bo iq heuyauyau neix dwg dieg guhcaemz angqfaengz seiziq gou, de dwg ndaw ndaejgeiq gou ceiq angq, ceiq siengjniemh haenx.

(haj nienzgaep Vangz Cinhanz)