Ranz gou lumj aen suendoenghduz iqet ndeu. Baihndaw miz “duzvaiz” daxboh gaenxguh youh naengzganq， miz daxmeh gaenxguh lumj duzrwi nei, miz dahnuengx lumj duzmanaez ganvad nei, lij miz “duzlingz” cabheiq——gou. Lajneix, gou daiq daihgya daeuj yawjyawj “aensuendoenghduz” ranz gou.

Gangj daengz daxboh gou, vunz ndaw mbanj mbouj miz vunz mbouj iet fwngzmeh haenh de dwg boux gaenxguh ndeu. Mboujloek, daxboh gou gaenx lumj duzvaiz nei. Miz seiz, dou gwn ngaiz lo, hoeng daxboh lij youq ndaw reih dwk raemx coq byaek, gyoengqvunz banringz yietnaiq, de youq laj daeng- ngoenz cae naz ciemz nywj; doengxhaemh de lij saeqsim dajleix miuz godumh. Gou cam daxboh：“Daxboh, mwngz baenz ngoenz guhhong, mwngz baeg lwi?”Daxboh han gou：“Baeg, cijaeu soucingz ndei, sou ndaej gvaq saedceij ndei, baenzlawz baeg cungj dij.”Gou dingq le ndawsim gig gamjdoengh. Neix couh dwg“duzvaiz” daxboh gaenxguh youh naengzganq.

Daxmeh gou gaenxguh lumj duzrwi, baenz- ngoenz nyaengq mbouj dingz. Seiz sou makdumh, daxmeh nyaengq mbaet makdumh fwngz mbouj dingz, mbaet daengz lauxbanj gangj mbouj aeu lo cij dingz fwngz. Daxmeh gangj, mbaet lai gai lai ndaej ngaenz lai. Ranz gou mboujdan ndaem makdumh, vanzlij ndaem lwgmanh、haeuxyangz. Seiz sou lwgmanh, daxmeh hwnqromh ninzhwnz sou lwgmanh bae gai. Mwh sou haeuxyangz bae gai, daj gyanghaet caet diemj cung bae haw gai daengz gyanghaemh caet diemj cung, gai mbouj liux mbouj maranz. Daxmeh lumj duzrwi nei, vih ndaw ranz gwndaenj vandiemz gaenxgyaek sinhoj guhhong.

Gangj daengz dahnuengx gou, gou roxnyinh de lumj duz manaez nei, ngahgwn youh ganvad. Miz baez ndeu, gou cawx ma song bau saejdaeuz iq, gou gwn bau ndeu, cuengq bau ndeu youq ndaw doengj- gvih, swnh gou mbouj haeujsim, de yaengyaeng byaij gvaqdaeuj, caeg bau saejdaeuz gou, mwh gou fatyienh, de lij caegriu dem.

Gangj daengz gou, gou lumj duzlingz nei, miz di cabheiq. Miz baez ndeu, gou bae Suenva Sanhgih guhcaemz, gou lumj duzlingz nei angq ndaej diuq hwnj diuq roengz, mbouj dingz faen cung ndeu, hanh lae hanh roenx. Lij miz baez ndeu, gou caeuq doengzdoih doxdax benz hwnj gwnz aen danhgang bae, yawj bouxlawz benz ndaej ceiq vaiq, gou din fwngz riengjret, yaepda couh benz hwnj gwnzdingj bae lo, gou ndaej hingz lo. Haha, gou miz di cabheiq, hix miz di dwggyaez ba.

Neix couh dwg “suendoenghduz”iqet ranz gou, saedceij dou gvaq ndaej angqyangz youh vuenyungz. (bouxlauxsae son’gyauq Vangz Gveiyangh)