Hagdangz dou mbouj suenq hung, hoeng cungjfaex gig lai. Hagdangz gizgiz cungj miz faex, ceiq yinx vunz cimyawj dwg gominz hungsang youq bakdou hagdangz haenx, gou heuh de guh “faexyinghyungz”.

Seizcin dwg seiz ceiq ndeiyawj gominz. Baenz duj baenz duj va ndingyanyan, couh lumj baenz bog baenz bog feiz iq dawzyubyub nei. Mwh “bogfeiz iq” cungj diemj dawz, gominz couh lumj fwjhaemh youq gyangmbwn ndingyanyan, gig wenjda ndeiyawj. Gou raen gvaq haujlai va gyaeundei, miz vamauxdan Lozyangz, miz vamoiz Dunghhuz, lij miz vayinghvah Vuyenz, gijneix cungj dwg ndaem baenz benq hung cij baenz funghgingj gyaeundei, hoeng gominz cij aeu go ndeu, de mboujlwnh ndwn youq gizlawz, cungj ndaej hawj gizde bienqbaenz giz fungh- gingj gyaeundei ndeu. “Va’nding lij aeu mbawheu boiq”, hoeng gominz mbouj yungh mbaw de daeuj boiq, aenvih mwh de hai va, doenghgo henz ndang de cungj baenz mbawheu lo. Aiqdwg cijmiz yinghyungz cij ndaej- daengz cungj doiqdaih daegbied neix ba!

Vaminz yienznaeuz dwg va, hoeng de yawj hwnjbae engq lumj gienh gunghyibinj ndeu. Caeuq vamauxdan、vamoiz、vayinghvah doxbeij, gij saek de mbouj gaeuq lai, engq mbouj miz feih- hom yinx vunz, hix mbouj lumj gij va wnq oiqup gyaeundei, haj dip va de ndaetndi nem youq doxcaez, youh hung youh na youh raeuz, lumj aeu gihgi guh baen aen cung’va ndeu, youh gyaqciq youh gietsaed. Gyoengqde daj dingj faex geijcib mij sang doek daengz gwnz dieg, hix mbouj yungzvaih, couhcinj youq gwnz dieg ninz geij ngoenz, rumz ci fwn rwed, lij gig cingsaenz gvaek- gvaek, caen dwg va faexyinghyungz hai okdaeuj ha!

Mwh vaminz loenq roengzdaeuj, gip vaminz baenz cungj hozdung miz- yinx roengzdangz ndeu. Miz seiz, gou ndwn youq laj gominz, ngiengx aen- gyaeuj, yawj byaifaex sangvid, muengh bongj daeuj raq rumz ndeu, roxnaeuz mbin daeuj duz roeg ndeu, yienghneix couh ndaej yawj vaminz doek roengz- daeuj. Vaminz baenz duj baenz duj doek roengzdaeuj, miz seiz yaek caj haemq nanz seizgan. Ngiengx gyaeuj yawj gominz sangvid, couh lumj ndwn youq baihnaj yinghyungz nei, cij fatyienh swhgeij dwg geijlai iqet ha!

Moix bi seizcin, youq ndaw geiq- ciet ceiq gyaeu, gominz hagdangz hai ndaej hoenghhwd. De dwg buengjyiengh raeuz hagsib, raeuz hix wnggai youq nienzgeij ceiq ndei neix, roengzrengz hailangh.

(sam nienzgaep Cau Yinjlieng)