Bi’gvaq haj nyied ngoenz ndeu, daeggo daiq gou bae Daging Vuzswh Daya yawj baijgai, gizhaenx baij miz gak cungj gak yiengh doxgaiq, gou sikhaek deng aen doengzbit lwgdouq ndeigyaez ndeu ciuyinx lo. Gou gaem doengzbit lwgdouq youq ndaw fwngz, yawj dwk ngaez bae, sij mbouj ndaej byaij bae. Daeggo raen gou gyaez mbouj sij cuengq, couh cawx hawj gou lo .

Gou gaem aen doengzbit duz- douq dwggyaez neix, gaej dwen miz geijlai angq lo. Sijsaeq yawj, cij raen cehda duzdouq lumj rinbaujlamz ityiengh rongh, aenbak iqet mbeuj doxhwnj riu dwk, dwggyaez lai lo. Gwnz gyaeuj de doiq rwz raezrangh henjrwg, bwn yungzyubyub, lij seiz mbouj seiz doengh mbat ndeu, lumjbaenz dongx gou nei. Diuzrieng iq gutgungq baenz aen giuz iq ndeu, deng de giuj yo youq baihlaeng. Geubuh caeuq geuvaq saekdamh- loeg daenj youq gwnz ndang de, hawj vunz yawj daengz roxnyinh sangj raixcaix, mbaw gaensei hausag heux youq gwnz hoz de haenx, hawj duzdouq iq demgya le geij faen gyaeundei.

Duzdouq dwggyaez raixcaix. Mwh gou daj ndaw doengzbit dawz bit okdaeuj yaek sij cozyez, couh lumjbaenz yawjraen duzdouq cingq yungh gij lwgda gujli de doiq gou naeuz:“Bouxcawj iq, mwngz itdingh aeu nyinhcaen sij cih、guh daezmoeg, gaej rubrab guh.” Mwh gou sij sat cozyez dawz bit cingjcaez cuengq haeuj ndaw doengzbit bae, youh lumjbaenz dingqnyi duzdouq iq riunyumj doiq gou naeuz:“Bouxcawj iq, mwngz caen dwg laeq lwgnyez lingzleih、maij hagsib ndeu ha.”

Couh yienghneix, doengzbit duzdouq baenz boux doih hagsib gou noix mbouj ndaej ndeu.

Seizgan lumj naq, bi’ndwen lumj daeuq, baez yaepda, aen doengzbit duzdouq gaenq buenx gou gvaq ndaej bi ndeu lo, youq ndaw gij saedceij neix, yienznaeuz gou youh dem mbangj doxgaiq moq hagsib yungh haenx, hoeng aendoengzbit duzdouq lij dwg doih ndawsim gou ceiq gyaez.

(bouxlauxsae son’gyauq Cinz Dunghvah)