Ndaw gwndaenj raeuz fatseng gvaq haujlai saeh, miz gij saeh angq、siengsim、mizyinx, dangyienz haengjdingh noix mbouj ndaej gij saeh nanzlumz haenx.

Haenx dwg mwh gou 7 bi, miz ngoenz singhgiz ndeu, daxmeh heuh gou hwnqmbonq, hoeng, gou lij ngunhngwd ninz dwk, cigdaengz daxmeh heuh gou gwn haeuxcaeux seiz cij hwnq. Baez hwnq couh gamjdaengz aen’gyaeuj naekgywd, hoeng gou lijdwg nyaenx youq lo. Daxboh daxmeh daiq dahnuengx okdou lo, gou boux dog gag youq ranz yawj densi, banngaiz miz doengzhag heuh gou bae guhcaemz gou hix mbouj okbae. Banngaiz, gou hix mbouj gwnngaiz. Sawqmwh, gou gamjdaengz ndang mbouj miz rengz, fatnit, gou couh aeu geij fan denz daeuj goemq.

Banhaemh daxmeh ma ranz, raen gou ninz youq gwnz mbonq mbouj doengh, baez lumh gyaeuj gou couh hemq “vaiq soengq bae yihyen. ”

Daengz yihyen le, ginggvaq canghyw genjcaz, canghyw gangj dwg aenvih dwgliengz, mbouj gibseiz gwn yw cix yinxhwnj fatndat lo. Youq seizneix dungx gou yiengj “gu gu”, daxmeh gangj:“Dwg mbouj dwg banngaiz mbouj gwn ngaiz ne?” Gou gangj: “Mwngz baenzlawz rox ne?” Daxmeh gangj: “Gou yawjraen gwnz daiz gij haeuxbyaek di hix mbouj doengh couh rox lo.”

Youq gou baenzbingh seiz, vunz ranz gou doiq gou gig ndei, naihsim ciuqgoq gou, hawj gou gamjdaengz gig vuenyungz.

Neix couhdwg gienh saeh hawj gou nanzlumz ndeu, yienznaeuz de dwg gienh saeh iqet ndaw gwndaenj ndeu, hoeng de cix gaek youq ndaw uk gou, itcig nanzlumz.

（bouxlauxsae son’gyauq Luz Sezyen)