Ngoenzneix lauxsae yaek haenh boux vunz ndeu, dwg bouxlawz ne? Mbouj loek, dwg Veiz Lingz. Haenh de yienghlawz ne? Dangyienz dwg haenh de sij cih ndei lo.

Lauxsae dawz bonjngoenzgeiq cuengq haeuj douzyingjyiz bae hawj dou cienz ban doengzhag yawj. Dou yawjraen gij cih Veiz Lingz le cungj haenh hwnjdaeuj：“Va, lajmbwn baezlawz miz cih sij ndaej yienghneix ndei ne? Ndeiyawj lai lo.” Dahraix, cihsaw Veiz Lingz sij haenx vengz bingz cig soh, fuengfueng cingqcingq, cingjcaez lumj dajyaenq okdaeuj nei. Lauxsae itcig haenh de, mboujcix dwg“de sij cih yienghneix ndei, daxmeh de angq lai lo, gwn raemx cungj rox diemz lo.” mboujcix dwg “mwngz baenzlawz yienghneix ndei ne?” haenh dwk gyoengqdou cungj dahoengz lo. Lauxsae youh heuh de lwnh gij mimiz sij cih ndei hawj dou nyi, yienzlaiz dwg de sij cih seiz mboujgip mboujmuengz, gig miz naihsim, baez bit baez veh cungj iugouz swhgeij sij ndaej fuengfueng cingqcingq.

Dingqnyi Veiz Lingz baenzneix gangj, gou roxnyinh najhoengz dangqmaz, gou bingzseiz cungj siengj vaiqdi bae guhcaemz, ganjgip sij sat cozyez, di ndeu nbouj guenj cih sij ndaej baenzlawz yiengh, baezlaeng gou aeu yiengq Veiz Lingz hagsib lo.

(bouxlauxsae son’gyauq Vangz Gveiyangh)