Gou miz yiengh doxgaiq simgyaez ndeu, daihgya cai dwg gijmaz ne? Hawj gou daeuj lwnh sou nyi ba, dwg aen funghsan iqet lingzloengz ndeu. De dwg mwh gou gvaq ngoenzseng, daxmeh dang gij laex ngoenzseng soengq hawj gou. Aenfunghsan raez daihgaiq 20 lizmij, sang daihgaiq 8 lizmij, na daihgaiq 3 lizmij. Ndang de daenj buh saek hoengzmaeq, cungqgyang miz sam aen gien luenz, baihgwnz veh miz aen doz saek hoengzmaeq ndeu, couhdwg duj vasiet gig ndeiyawj ndeu； raeblaeng baihlaj miz aen hab cang denciz ndeu, baihndaw cang miz song aen denciz ngeihhauh.

Gwnz naj funghsan miz aen haigven ndeu, de miz nyieg、cung、giengz sam dangj. Haigven baihlaj lij miz aen dienhdoengz iqet ndeu, cijaeu hai aen haigven, de couh sikhaek rongh hwnjdaeuj, mwh siengj gven de naenx aen haigven couh gven lo .

Mwh mbwn ndat, gou yungh de daeuj beiz rumz, gij rumz de liengzsisi, cwxcaih dangqmaz. Geiq ndaej miz ngoenz singhgiz roek daengngoenz ronghsag ndeu, dou daengx ranz vunz bae Majcaujgyangh Gunghyenz youz. Mwhhaenx mbwn ndat raixcaix, gou daiq aen funghsan iq neix bae lo. Gou doq byaij doq hai aenfunghsan daeuj beiz rumz, mbouj roxnyinh daengz ndat saekdi. Sawqmwh gou daemjndoet deng laemx lo. Mwh gou yaek benz hwnj- daeuj, aen funghsan iq venj youq gwnz hoz haenx hix doek roengzdaeuj lo, de lumjbaenz doiq gou naeuz:“Heuh mwngz byaij roen mbouj yawj roen, danghnaeuz mwngz caiq baenzneix mbouj siujsim, gou couh mbouj caeuq mwngz guhcaemz lo, gou bae ra siujbaengzyoux wnq lo, hw!” Gou dingq le, ndawsim siengj: Gaej lau, cuengq- sim ba! Baezlaeng gou mbouj caiq yienghneix lo !

Neix couhdwg yiengh doxgaiq simgyaez gou —— aen funghsan iq ndeu.

(bouxlauxsae son’gyauq Liengz Haijyangz)