“Gyoengqraeuz ciengq dwk dunghfanghhungz, danggya guhcawj ndwn hwnjdaeuj, gyoengqraeuz gangj aengoj seizcin, gaijgwz hailangh fouq hwnjdaeuj ……” Moix baez dingq daengz diuz go neix, ndawsim gou gikdoengh dangqmaz! Dingq daxbuz gangj daj gaijgwz hailangh daengz seizneix, vunzraeuz gwndaenj ndei hwnjdaeuj lo, guekcoj raeuz maenh- ak lo.

Ngoenz singhgiz ndeu gou caeuq daxbuz bae lajmbanj lieb caencik, daxbuz gwnz loh daengq gou, daengz ranz buzbaj seiz aeu roxlaex bw, mbouj ndaej luenh fan doxgaiq bouxcawj. Gou ngaek gyaeuj han naeuz: “Cuengqsim ba, daxbuz.”

Banci youq doenghlaeuz sangvid ndeu dingz roengzdaeuj, daxbuz doiq gou naeuz: “Lan ha, daengz lo, vaiq di roengz ci ba!” Gou yawjyawj, mbouj- deng ha, wnggai mbouj dwg youq gizneix, gou geiq ndaej ranz buzbaj dwg ranzvax, dangseiz baihnaj bak- dou hix mbouj miz diuzloh suijnaez ne! Gou gaem fwngz daxbuz gangj:“Daxbuz, mwngz dwg mbouj dwg geiq loek lo, mbouj dwg gizneix ne?”

Daxbuz sikhaek dawz soujgih okdaeuj dwk dienhvah hawj buzbaj, ndaw soujgih sikhaek yiengj hwnj singlingz “mbouj miz gungcanjdangj couh mbouj miz Cungguek moq, mbouj miz gungcanjdangj couh mbouj miz Cungguek moq, gungcanjdangj de itsim gouq Cungguek……” ciep dwk ndaw dienhvah yiengj hwnj sing buzbaj:“Nuengx ha, daengz mbouj caengz? Roengz banci raen aenlaeuz- moq sam caengz buenq haenx couh dwg lo.”

Gangj sat dienhvah couh raen bakdou laeuzmoq hai lo. Buzbaj riunyumj okdaeuj rag fwngz daxbuz haeuj ranz bae. Yamq haeuj ndaw ranz buzbaj, gou dadaengx lo. Ndaw ranz baij ndaej geijlai gyaeundei ya, couh lumj aen gungdienh nei. Gij daeng- diuq ronghsagsag venj youq gwnz dienvabanj, byaij hwnj laeuz bae, aenlae dwg aeu benjfaex daeuj bu, byaij hwnjbae mbouj miz saekdi sing, aenlae raeuzrwd lwenqda, raizfaex gyaenndei dangqmaz, hawj gou nyinhnaeuz byaij haeuj binhgvanj hajsinggaep bae. Daengz gwnz laeuz dinghung, buzbaj dawz mak caeuq caz daeuj dakdaih dou, doiq dou naeuz:“Sou ngamq daengz hozhawq lo, sien gwn mak gwn caz gonq.”

Ndaw fwngz gaem mak gwn, da yawj aen densi 60 conq hung, ndawsim gou nyaenx mbouj ndaej haenh:“Va, lajmbanj bienqva caen hung ya!” Buzbaj itmienh heuh dou gwn mak, itmienh gangj geij bi neix lajmbanj bienqvaq, cujyau dwg gungcanjdangj dazyinx ndaej ndei, yinx nungzminz byaij hwnj diuzloh fouqmiz. Buzbaj lwnh gou, gyoengq bohnax seizneix cingq youq ndaw reih dwk raemx, ndaw reih ndaem miz haujlai mak, raeuz gwn ngaiz le bae mbaet mak……”

Daxbuz song cejnuengx hai aen gihciengqheiq daeuj dingq, ndaw gih ciengq:“Ngoengzneix dwg ngoenz- ndei, siengj maz couh ndaej maz, ngoenzneix dwg ngoenzndei, raeuz hai douranz coux seizcin……”

(bouxlauxsae son’gyauq Luz Dunghginz)