Moix boux vunz ndawsim cungj miz boux vunz boiqfug ndeu, gou hix dwg yienghneix, gou ceiq boiqfug lauxsae gou, de couhdwg Veiz lauxsae.

Veiz lauxsae byoem de ndaem- ndwtndwt, doiqda ronghrik lumj- baenz rox gangjvah nei. Moix baez gou guh saeh loek, lauxsae couh yungh lwgda ndatheiq yawj gou, cigdaengz gou ngaem gyaeuj nyinhloek; danghnaeuz dou guh le saeh angq, song da lauxsae couh riunyumnyum, lumjbaenz yawjraen baujboiq nei!

Gou gingqboiq de dungxcaiz lai. Miz baez ndeu, hwnj dangz- gaghag, gou cingq guh cozyez suyoz, hoeng, miz diuz daezmoeg ndeu gou naemj le haujlai nanz cungj naemj mbouj ok. Gou siengj cam doengzhag ba, youh lau doengzhag mbouj nyienh bang gou, cam lauxsae ba, suyoz lauxsae youh mbouj youq ndaw gyausiz. Seizneix, Veiz lauxsae byaij daeuj coh gou, hozswnh dwk cam gou: “Siujyaz, mwngz baenzlawz lo, bungz daengz gijmaz nanzdaez ne?” Gou suksuk siemjsiemj dwk gangj: “Lauxsae, diuz daezmoeg neix gou mbouj rox baenzlawz guh, naemj le haujlai nanz cungj naemj mbouj ok.” Veiz lauxsae yawj le yawj daezmoeg, naemj yaep ndeu, couh menhmenh gangjgej hawj gou dingq. Gou gingqboiq dwk yawj de, yienzlaiz dwg yienghneix guh.

Lij miz baez ndeu, gou dungx in lo, Veiz lauxsae rox le, couh fuz gou daengz bangunghsiz de bae. De gip ndaej lumj duzmoed gwnz rek ndat nei, de aeu raemx daeuj hawj gou gwn, lij seiz mbouj seiz cam gou lai ndei mbouj caengz. Gou han naeuz: “Lai ndei lo. Docih lauxsae!” “Ndei couh ndaej lo, gou yousim yaek dai lo. ” Gou dingq le, raemxda sikhaek aeng youq ndaw gvaengzda. Veiz lauxsae raen le, couh lumhlumh aen’gyaeuj gou naeuz:“Lwg huk ya, neix dwg lauxsae wnggai guh, sou couhdwg lwg gou ha. ”

Neix couhdwg boux vunz gou boiqfug ndeu, yijvwnz lauxsae——Veiz lauxsae.

(bouxlauxsae son’gyauq Veiz Libingz)