“Ranzmbanj gyaeu, ceiq gyaeu dwg raemx ranzmbanj, gyanghaet daengngoenz ciuq, va’ngaeux ndaw raemx ninz……” Gou ciengq dwk go, simcingz gig ndei, angqyangz bae rog dauqcawq yawjyawj.

Geij ciengz fwnmoenq doek gvaq le, ndaw doenghnaz, ndaw daemzngaeux, gwnz ndoibya, cungj dwg heuswdswd lo. Henz dah song mbiengj heuoiq, gij saek de vunzraeuz cungj diuz mbouj ndaej okdaeuj ne! Gwnz nye goliux, mbaw heuoiq, gwnz nyeliux hai rim va henjoiq, gij va neix mbinfengfeng, doek daengz gwnz dieg henjrwgrwg, doek roengz dah bae, swnh raemx dah lae bae. Duzbya iq angq ndoj youq laj dujva youzvetvet, gyoengq mehbaj mehsimj youq henz dah itmienh saeg buhvaq, itmienh angqvau gangjgoj, seiz mbouj seiz fat ok sing riugwkgwk, duz mahenj ndeu youq henz dah buet bae buet dauq. Gou vid ga vaq, dangh roengz raemx bae, raemx liengzsisi. Rumz yaengyaeng ci, gwnz mbwn roegenq mbinfifi, gyoengqde baez ngeng ndang, couh mbin haeuj gyangmbwn mbouj raen lo. Raemx ranzmbanj ciengx vunz ranzmbanj, gou gyaez raemx ranzmbanj.

Raemx ranzmbanj unqnemnem ciengx ok bya ranzmbanj heusausau. Geij sing byajraez cin yiengj gvaq le, gyanghwnz fwncin laeglemx doek roengz- daeuj. Gyanghaet, raemxdah hwnj sang lo, doenghgo gwn imq raemxcin le, engq heu lo. Gwnz dingjbya goemq caengz mok ndeu, gyaegyae yawj bae, fwj caeuq mok doxgyaux hoedheux dingjbya, mumjmumj gyumqgyumq, hoeng, goemq mbouj ndaej bya heusausau.

Youq laj dinbya, miz geij byoz hoengzfwdfwd, neix dwg vadauz hai va lo. Goging henz mbanj hai va cingq hoenghhwd, va saekgyaemq hai ndaej ndeiyawj dangqmaz, youq ndaw rumzcin raeujrub youh nyinhcumx neix, limqva loenq rim gwnz dieg. Henz loh bakmbanj song mbiengj, gofaex hung hix cingq maj noengq, de vad gaiqfwngz rengzrwd dongx gou ne! Daswyenz dwg daxmeh raeuz, raeuz itdingh aeu baujhoh ndei de. Geij bi neix daeuj, cwngfuj ok haujlai ngaenzcienz, heuh daihgya baujhoh vanz- ging, lai ndaem gofaex, canggyaeu lajmbanj. Seiz- neix lajmbanj gizgiz heuyau seuqcingh gyaeundei lo.

Gou ma ranz, raen doiq roegenq hix gaen ma ranz, gou ngiengx gyaeuj yawj, daxmeh roegenq cingq youq aenrongz caep youq laj yiemhranz ranz gou haenx bwnq lwg de ne.

Vunz ranzmbanj caeuq daswyenz doxndei doxhuz caemh youq, geijlai gyaeundei huzndei ha!

(bouxlauxsae son’gyauq Leiz Fwnhlinz)