Ranz gou lumj aen “suen- doenghduz” ndeu. Gij “doenghduz” ndaw “suendoenghduz” mizyinx lai lo, seizneix gou daiq daihgya daeuj yawjyawj ba.

Daxboh gou couhdwg duz vaiz ndeu, lauxsaed haengj guh, gwnhoj naihhaemz. Vih gij gwndaenj ranz dou, de ngoenznaengz ranz caengz rongh couh okdou guhhong, ban- haemh mbwn laep liux cij dauq ranz, ma daengz ranz le, lij bang daxmeh guh hongranz, dou moix ngoenz banngoenz cungj gig noix raen de, cijmiz mwh gwn caeuz cij ndaej raen naj de.

Daxmeh gou lumj duz bit ndeu, ngoenznaengz cijaeu dou youq ranz, de couh lumj duzbit nei “gaga” dwk hemq mbouj dingz: Sij cozyez liux la? Baetbaet aenrug mwngz, daiq dahnuengx bae guhcaemz yaep ndeu daengjdaengj. Deng lo, “duz bit” neix youzraemx ak dangqmaz. Baez ndeu gou caeuq de bae youzraemx, caenh dingq “bu” sing ndeu, mbouj daengz buenq faen cung, daxmeh couh youz daengz baih doiqnaj bae lo, caen lumj duzbit lingzvued he.

Dahnuengx lumj duz douq ndeu, moix ngoenz saetsaet diuq- diuq, coengzlaiz cungj mbouj roxnyinh daengz baeg, “duzdouq” gig gyaez gwn lauxbaeghoengz caeuq byaekheu. Cijaeu daxmeh cawj lauxbaeghoengz caeuq byaekheu, de cungj lumj byajmyig ityiengh vaiqvet buet gvaqbae, dawh cungj mbouj dawz, fwngz iq nyaeb haeuj ndaw bak, gwnguk ndwnj nyaen, gwn ndaej vanj hung bae.

Aen“suendoengh- duz” ranz gou mizyinx lwi? Angqcoux sou daeuj ranz gou guhhek.

(bouxlauxsae son- gyauq Yiz Cungzcih)