Ranzmbanj gou youq lajmbanj Guengjsae, gizde daengx bi seiq- geiq cungj dwg raemx saw bya heu, funghgingj gyaeundei.

Seizcin daengz lo, ranzmbanj gou couh lumj dahsau daenj geu buh heu nei. Da yawj gvaqbae, ingj haeuj da cungj dwg heuswdswd, go’nywj gomiuz gofaex angqfwdfwd ndoet gwn fwncin, angq dwk naeuz: “Gou yaek vaiqdi majhung. ”

Seizhah daengz lo, ranzmbanj gou couh lumj aensuenva nei. Yawj, vamakndae、 vamakmoed、 vamakbug、 va’ngaeux…… miz hoengz、 henj、 hau、 aeuj…… gak saek gak yiengh ndeiyawj raixcaix.

Seizcou daengz lo, ranzmbanj gou engqgya gyaeundei lo. Yawj, ndaw doenghnaz henjrwgrwg, gohaeux cingq angq dwk naeuz: “Bineix demsou lo, vaiq daeuj gvej dou baema ba.” Gwnzbo, feih mak hom mbin gvaqdaeuj, hawj vunz nyouq daengz nyaenx mbouj ndaej myaiz rihroedroed. Makleiz、makndae couh lumj daengloengz nei venj youq gwnz gomak, makbug duengqyedyed, mwngz bungq gou, gou bungq mwngz……

Seizdoeng, ranzmbanj gou hix gig gyaeundei. Ndaw doenghnaz gomiuz gaenq sou liux, gyoengqdou lwgnyez langh vaiz youq ndaw doenghnaz le, couh bae vat maenz, caep yiuzmaenz……

Ranzmbanj gou yienznaeuz mbouj dwg funghgingjgih, hoeng daengx bi seiqgeiq cix cungj ndeiyawj raixcaix, muengh sou ndaej hoengq daeuj ranzmbanj gou ngonzyawj.

(bouxlauxsae son’gyauq Cinz Yozlenz)