Mungzgungh Cuhcungh dwg aen cunghyoz gig miz minzcuz daegsaek ndeu, dwg aen cunghyoz cingz Mbanj- cuengh gig noengz ndeu.

Daeujdaengz bakdou hagdangz, aen bakdou hungsang gyaeundei youh gaeuqgeq ndeu yienh youq dangqnaj, gwnz cungqgyang bakdou sij miz cih- saw henjgim “Dieg Doegsaw Boux- cuengh” gig lwenqda, gyoengqvunz lohgvaq cungj ndwn youq yawjyawj, nyaenx mbouj ndaej haenh naeuz: “Caen dwg aen hagdangz gyaeundei ndeu ha!” Byaij haeuj bakdou, wenj haeuj lwgda, dwg fuk doz minzcuz doxgiet caen lumj ranz ndeu, youq gwnz mbawdoz, 56 aen minzcuz gak daenj buhvaq lengj minzcuz swhgeij, bouxboux cungj najhai riunyumj. Mbawdoz baihlaj sij: Bouxgun liz mbouj ndaej saujsu minzcuz, saujsu minzcuz liz mbouj ndaej Bouxgun, gak saujsu minzcuz hix doxliz mbouj ndaej. Byaij haeuj ndaw hagdangz, miz diuzroq vwnzva Bouxcuengh ndeu, caiq byaij hwnjbae, heuxgvaq aenmuhrin caeuq aennienjraemx, go faexrungz hungsang gaenq 80 lai bi he daengj youq baihnaj. Laj gofaexrungz cuengq miz aen nyenz hung ndeu, neix couh daeujdaengz “Naz Vwnzva Bozvuzgvanj” mizmingz lo. Bozvuz- gvanj gig miz daegsaek Mbanjcuengh: Ciengz mong, vax lamz, baihrog gwnz ciengz venj miz haeuxyangz、lwgmanh、haeuxriengz daengj gomiuz, song mbiengj bakdou venj miz daengmax. Ndaw ranz baij miz gij hongdawz、gwndaenj yungh Bouxcuengh, lumj- baenz aennda、sawdauh、funggvih、ruqmou、aenrum…… wng miz cungj miz, hawj vunz yawj dava bae. Daj bozvuzgvanj byaij okdaeuj, couh daeuj daengz dieg “yiemzgei”, gwnz ciengz yiemzgei mbiengjgvaz cuengq aendom hung, mbiengjswix cuengq aennyenz hung, cungqgyang sij miz “Vih Lwg Mbanjcuengh Cangqvuengh Majhung Caepndei Giekdaej”. Lingh sam mbiengj bangxciengz dwg dozanq caeuq cihsaw Bouxcuengh.

Geij bi neix daeuj, hagdangz caep ndaej haujlai laeuz moq lo. Laeng laeuzdoegsaw dwg seiq aen lanzgiuzcangz, henz cauhcangz diuz lohbuet hopheux 800 mij raez, seiqhenz faex mwn raemhrwd, va hai rangfwd, roeg hemq singset, hoengheiq singjsien, laj gofaex baij miz daizrin, eijrin, hawj hagseng naengh yawj saw、yawj dwkgiuz、yietnaiq、gangjgoj, gizneix caen hawj vunz simsoeng cwxcaih. Mbiengjgwnz giuzcangz dwg laeuzdoegsaw caeuq diegyouq lwg- mbwk, caiq hwnjbae couh daengz “suen fungsou” lo, gizneix dwg dieg guhhong hagseng caeuq lauxsae, ndaw suen seiqgeiq gva mak homfwd, go’byaek heuyau. Youq gwnz ciengz- humx “suen fungsou”, mbiengjgvaz dwg banjbauq ciet sam nyied sam Bouxcuengh, mbiengjswix dwg banj- bauq cihsiz 24 aen cietheiq guek raeuz.

Byaij youq ndaw hagdangz gvangqlangh neix, gizgiz cungj gyaeu- ndei, seizseiz cungj dingq ndaej nyi sing doegsaw, yawj ndaej raen lauxsae doengzhag dwkgiuz roxnaeuz guhhong.

Gou gyaez hagdangz Mbanj- cuengh dou. Angqcoux mwngz daeuj hagdangz dou yawjyawj gij funghgingj gyaeundei de.

(boux lauxsae son’gyauq Dwng Sizmingz)