Ndaw sujgyaj banhaet ndeu, gou ndwn youq gwnz yangzdaiz, sup hoengheiq singjsien, yawj gij va gou ndaem haenx youq laj ndit doxcanj haiva, ndawsim geijlai angq ha.

Mwhde, daj gwnz laeuz cienz daeuj sing bek fandenz “bub bub bub”. Gaendwk, faiqgung caeuq faenx lumj doek nae nei mbin roengzdaeuj, gij “doxgaiq uq” neix caeuq gingjsaek gyaeundei baihnaj gou gig mbouj doxdaengh. Gou nyaenx mbouj ndaej hat naeuz: “Bek gijmaz bek, haetromh couh uqlah hoengheiq!” Hoeng sing bek gwnz laeuz mboujdan mbouj dingz roengzdaeuj, lij bek ndaej engq haenq dem. Fouznaih de youq baihgwnz ciemq dieg ndei, gou cijndei doiq haeuj ranz daeuj. Gvaq yaep ndeu, sing bek denz dingz roengzdaeuj lo, gou ganjvaiq okdaeuj, dawz aen huzraemx bang gij va gou deng uq haenx “swiqndang”. Naedraemx sawndik youq gwnz mbaw ringxndindi, miz geij ndik lij cabheiq buet roengz laj laeuz bae. Gou swnh raemxndik yawj roengzbae, yo, gij raemx de cingqcingq ndik deng gwnz denz ranz laj laeuz dak haenx. Gou gip lo, baenzlawz guh ha? Couh youq mwhde, daxbuz ranz laj laeuz iet aen’gyaeuj okdaeuj, de yawjyawj fandenz, youh ngiengx gyaeuj yawjyawj gou. Gou engq lau lo, lau de ndaq gou, gou couh saetnaj lo. Byawz rox, daxbuz riuriu, hozswnh doiq gou naeuz:“Ngoenzneix mbwn ndei, dwg yaek rwed raemx gova lo, yawj gij va neix hai ndaej geijlai gyaeu ha!” Gangj le, de daenq fandenz gvaq henz bae, haeuj ranz bae lo. Gou gyaengj youq lo, daxbuz ranz laj laeuz yienghneix guh lumj daezsingj gou gijmaz nei. Gou roengzrengz bae naemj, hoeng sing bek gwnz laeuz sawj gou fwt singj gvaq- daeuj.

“O, gou rox lo!” Gou angqvauvau, iet gyaeuj ok yangzdaiz bae, ngiengx gyaeuj yawj coh baihgwnz, cingq ngamj daxheiz gwnz laeuz hix yawjraen gou. Gou riu dwk doiq de naeuz: “Daxheiz, mbwn baenzneix ndei, dak denz geijlai ndei ha!” Mwhde lwnz daengz de gyaengj youq lo, cij raen de naj nding lo, yaengyaeng bek fandenz song mbat, couh haeuj ranz bae lo.

Siengj rox gou rox gijmaz loma? Gou rox lo: Laxlawz doxnyiengh doxrox ndaej lumj raemx- raeuj nei vaq gij nae nit ndawsim vunz bae, vaq gij saeh hozndat bae.

Gou ndwn youq gwnz yangzdaiz, rox- nyinh seizneix ndit engq raeuj engq rongh lo.

(seiq nienz- gaep Vangz Swjgiz)