Daxbuz gou gaenq roekcib lai bi lo, youq gwnznaj luenzlulu de miz doiq lwgda ronghliklik caeuq aen ndaeng lingzloengz ndeu. Aenvih de bingzciengz gyaez bang vunz, gyoengqvunz raen de le, cungj yiedcingz caeuq de gangjgoj camndei, couhdwg lwgnyez raen de le, hix cungj caenciet dwk hemq sing“daxbuz ndei”.

Bi’gvaq seizdoeng, dienheiq gig nit, ranznden buz Lij bingh lo, ninz youq gwnzcongz gyangznaek gywggywg. Buz Lij mbouj miz lwg youq henz ndang ciuqgoq, gig siliengz. Daxbuz gou rox le, couh bae yihyen cawx yw, dauqma youh dawz yw soengq daengz henz bak buz Lij. Mwh de yawjraen buz Lij naengh hwnjdaeuj mbouj bienh, daxbuz gou couh aeu denz daeuj, demh youq baihlaeng de, hawj de menhmenh ing, yienghneix, buz Lij couh roxnyinh cwxcaih lo. Buz Lij gikdoengh dwk gangj:“Mwngz ciuqgoq gou, caen lumj ciuqgoq vunz ndaw ranz ityiengh.”Daxbuz gou riu dwk gangj:“Miz dwgrengz, daihgya wnggai doxbang.”Daxbuz gou ngoenzngoenz cungj bae ranz buz Lij ciuqgoq de, mbouj geij nanz, buz Lij bingh ndei lo.

Lij miz baez ndeu, gou caeuq Siujmingz cuengqhag dauqma, youq gwnz loh, Siujmingz mbouj siujsim deng laemx lo, gyaeujhoq lwed lae mbouj dingz, de in dwk daejnganga. Cingq youq seizde, daxbuz gou dingqnyi sing daej, couh gipmuengz daj ndaw suenbyaek buet gvaqdaeuj, aeu gaiqbaengz bau gyaeujhoq Siuj- mingz ndei, aemq de ma ranz. Ma daengz ranz, daxbuz youh aeu yw daeuj cat, doq cat doq gangj:“Mbouj youqgaenj law, gvaq geij ngoenz couh ndei lo, baezlaeng byaijloh aeu siujsim di.”Doeklaeng, daxbuz youh aeu ngaiz daeuj hawj Siujmingz gwn, Siujmingz gikdoengh dwk daej lo.

Daxbuz gou sim gig ndei, gig gyaez bang vunz, ndigah gyoengqvunz gig gyaez daxbuz gou.

(bouxlauxsae son’gyauq Veiz Libingz)