Gou miz boux doih ndei ndeu. Haetromh de buenx gou coh daengngoenz bae hagdangz, banhaemh daengngoenz roengzbya, de youh caeuq gou doxcaez longz geubuh fwjhaemh byaij ma ranz, de couhdwg baengzyoux ndei gou——daehsaw gou.

Daj gou baez daih’it raen de, gou couh gyaez de. Baihrog de dwg saekhoengz, baihgwnz boemz miz duznou Mijlaujsuj dwggyaez ndeu, gwnz gyaeuj duznou cug miz aen hotmbungqmbaj hung ndeu, daenj geu vunjraez saekaeuj, gwnzhwet venj diuz saihwet saekloeg, din daenj gouhhaiz saekmaeq, couh lumj dahlwg vuengzdaeq baujboiq nei, cij raen de cik fwngz daemx hangz, cingq youq gwnz ceij sij gijmaz.

Aendaehsaw baen miz geij gek, ngoenznaengz gou cungj gaengawq gocwngz anbaiz, dawz saw caeuq cozyez baenloih cuengq caezcingj.

Daehsaw gou cungj dwg mbouj aeu hoizbauq fugsaeh gou, caeuq gou caemh vuenheij caez siengsim. Mwh gou guh saeh ngaiznged, mbouj gibseiz sousib de roxnaeuz mbouj siujsim loengh de luenhlablab, de naihsim naeuz gou nyi: Vaiq di gaemndaet seizgan sousib ndei, aeu insik seizgan ha. Mwh gou gaujsi cingzcik mbouj habhoz, de buenx gou caez siengsim nanzgvaq, doengzseiz nai gou: Saetbaih couh aeu hag gvai, baezlaeng cijaeu lai roengzrengz, itdingh ndaej gyaep hwnj baihnaj bae. Mwh gou ndaej haenhndei, de caeuq gou doxcaez faenyiengj gij angqyangz gou, caemhcaiq gienq gou ciengeiz mbouj ndaej ndaengmoj, laebdaeb roengzrengz, ceng’aeu guh lai ndei dem.

Aendaehsaw mboujdan dwg doih ndei gou, engq dwg baengzyoux mizik gou, de seizseiz daezsingj gou hagsib, coi gou cinbu, riengz gou majhung.

(bouxlauxsae son’gyauq Luz Ging- fungh)