Gyanghaet, mbwn’gvengq rongh- cingx, gou guh cozyez sat, couh bae ra baengzyoux guhcaemz, sawqmwh, yawjraen henz diegnywj miz aen ngaeuz sug ndeu, sijsaeq yawj, gwnz gyaeuj de yungh baengzhoengz cug song boeg byoem lumj gaeuyiengz, gwnz najbyak miz diemj geiqhauh nding ndeu, gwnz hoz raek aen giengenzgunh, fwngz gaem fagnangx, din caij loekrumzfeiz. “Ya, de mbouj dwg Nwzcah ma?” Gou gikdoengh dwk hemq hwnjdaeuj.

Nwzcah ngeux gyaeuj gvaqdaeuj, riunyumj doiq gou naeuz：“Mwngz ndei, mwngz siengj bae Dunghhaij guhcaemz lwi?” Gou baez siengj, Dunghhaij dwg gizdieg gou hwnz- ngoenz cungj siengj bae ha, gou angqvauvau dwk dapwngq de. Nwz- cah sikhaek din caij loekrumzfeiz, daiq gou mbin daengz Dunghhaij. Ngamq roengz dieg, dou couh nyouq daengz heiq haeungaungau, yawjraen gwnz najhaij fouz miz caengz fugfauz ndeu, henz haij doi miz haujlai labsab, caiq sijsaeq yawj, giz mbouj gyae miz duzbyagingh ndeu dai naeuh lo, nengznyaen ciuzhoho ne. Raen daengz yienghneix, Nwzcah hozbongz dwk naeuz：“Doengh bi gou youq gizneix dajcaemx seiz, raemx geijlai seuq- cingh, gou hwnj bya bae hag bonjsaeh geij bi, baenzlawz couh bienqbaenz yienghneix ne？”

Dou cingq sim’in youh mbouj rox baenzlawz banh ndei. “Miz lo!” Nwz- cah fwt hemq hwnjdaeuj. “Mwngz miz gijmaz banhfap?” Gou gipmuengz cam. “Raeuz gojyij dawz labsab bienq feiq baenz bauj, banh aen labsab haijyangz canjlanj ndeu!” Gangj guh couh guh, Nwzcah yungh faplig dawz labsab nyoengx hwnj gwnz danhaij daeuj, dou dawz labsab swiq seuq, baen loih le, guh gak cungj gak yiengh doxgaiq: Aeu yilahgvan guh baenz aen ruzgangfung valoekloek, aeu daehsuliu guh baenz geu vunjva, yungh bingz- suliu caep gunghden gyaqciq gyaeu- ndei, aeu gak cungj feiqliuh cang baenz gak cungj doenghduz, lumj- baenz gungjlungz、 saeceij、 duz- gaeng……

Guh ndaej haujlai yiengh le, dou couh mbin bae gak dieg guh vanzbauj gangjgaij, lij daiq gyoengqvunz daeuj yawj labsab haijyangz canjlanj dou. Gyoengqvunz yawjraen gijneix, cungj bekfwngz haenh dou guh ndaej ndei, lij gietsim baezlaeng caiq mbouj luenh gveng labsab, aeu guh boux vanzbauj veisw, baujhoh aenranz digiuz ndei.

Mbwn laep lo, Nwzcah din caij loekrumzfeiz, soengq gou ma ranz lo. Ngoenzneix, gou caeuq Nwzcah gvaq ngoenz miz yiyi ndeu, ngoenzneix, gou roxyiuj luenh vut labsab uqlah vanzging gig daih, haihcawq gig lai, gou yaek guh boux vanzbauj veisw ndeu.

(boux lauxsae son’gyauq Veiz Gyanghbingz)