Veiz lauxsae gingqgyaez:

Mwngz ndei!

Daj mwngz diuh bae gizwnq guhhong le, haujlai nanz mbouj raen naj mwngz lo, mbouj rox seizneix ndangdaej mwngz lij ndei lwi? Mwngz ndang byom lai, aeu lai gwn di bw! Gou dwg hagseng mwngz Luz Yinghvaz, o, couhdwg dahsau mbeiiq haenx. Lij geiq ndaej gou ba? Gaxgonq gou mbeiiq, naj youh mbang, mbouj miz saenqsim, nyangz daengz dwgrengz cungj siengj doiq dauqlaeng, dwg mwngz gaijbienq gou.

Mwngz ciengzseiz gangj:“Aeu mbeihung mienhdoiq dwgrengz.” Hoeng, gou seizhaenx cungj hawj mwngz daiq daeuj mazfanz. Mwh gaujsi cingzcik mbouj habhoz, gou sikhaek daejngenge; caeuq doengzhag doxceng, cungj youzcaih doengz- doih hangz gou; hagdangz guh Sawcuengh cozvwnz doxdax, hagsib veijyenz heuh gou bae camgya, gou lau saetbaih, ra gak cungj lijyouz doi deuz…… Gou cungj hagseng neix, nanzdauh mbouj hawj mwngz saetmuengh ma?

Hoeng, mwngz cungj gujli gou baez youh baez dem, gij naihsim mwngz hawj gou gamjdoengh, gij vah mwngz gou geiqmaenh ndawsim bae:“Cijaeu mbeihung yamq okbae, couh mbouj miz gijmaz gamx hamj mbouj gvaqbae.” Ciemhciemh dwk, gou gyaez gangj gyaez riu lo, miz saenqsim lo, ndaej swhgeij gag gamj mienhdoiq dwgrengz lo.

Lij geiq ndaej mwngz yaek diuh bae geiz haenx, youq hagdangz aeu Sawcuengh gangj gojgaeq doxdax, gou ndaej senj bae ndaw yienh camgya doxdax, neix dwg ndaw yienh yaek senj 5 boux ceiq ndei bae Namzningz doxdax ne! Aenvih bae ndaw singz doxdax, gou miz di gaenjcieng. Yaek hwnj daiz seiz, mwngz bekbek aenmbaq iq gou, riu naeuz: “Gaej lau, cijaeu mwngz roengzrengz lo, baizmingz mbouj suenq gijmaz.” Mienhdoiq bouxyawj, gou sim diuqbubbub, hoeng, gou yawjraen mwngz youq laj daiz riunyumj doiq gou yaengyaeng ngaek gyaeuj, couh youq seizhaenx, gou sikhaek simdingh lo……

Veiz lauxsae, docih mwngz! Aenvih miz mwngz gujli, gou cij gag miz saenqsim. Mwngz biek hagdangz bae haujlai nanz lo, maqmuengh mwngz miz seizgan ma hagdangz yawjyawj, caeuq dou gangjgoj, dou daengx gyoengq doengzhag cungj gig siengjniemh mwngz!

Hoh mwngz

Ndangcangq, guhhong swnhleih!

hagseng mwngz: Luz Yinghvaz

2019 nienz 9 nyied 5 hauh

(boux lauxsae son’gyauq Cinz Hungzmeiz)