“Daxmeh, gou aeu henx ndok! Gou aeu henx ndok!” Gou yawj gwnz daiz buenz ndokmou rangfwdfwd de, nyaenx mbouj ndaej aeu fwngz bae nyaeb. Daxmeh lienzmuengz lanz gou: “Duznon dam gwn neix, mwngz ra vanj ha!” Gangj sat, yungh gouh dawh nip gaiq hung ndeu cuengq ndaw vanj, “Caj de langh liengz yaep ndeu caiq gwn ba!”

Daj miz mouraq Feihcouh daeuj, nohmou noix lo, ndokmou bengz lo. Mboengqneix gwn nohgaeq nohbya cungj nywnx lo, gou geijlai ngah nohmou ha! Gaiq ndokmou ndaw vanj nem miz haujlai noh, cingcwtcwt youh youzyubyub, fwi heiq rangfwdfwd. Gou yawj dwk myaiz hwnjbyoegbyoeg, caj mbouj gib lo, iet fwngz bae nyaeb daeuj couh oet haeuj bak bae. “Aiya, lij log bak ne!” Gou hemqyoyo, song fwngz dawz gaiq ndok bau hwnj bau roengz, aeu bak boq bae boq dauq. Daeuq dwk daxmeh fwt riu hwnjdaeuj, dawh nip byaek doek lo. Daxboh hix riu dwk “a a” doekhoz lo. Daxmeh naeuz: “Gip gijmaz? Simgip gwn mbouj ndaej souhndat!” Gou cij ndei cuengq gaiq ndok roengz vanj, caiq caj yaep ndeu.

Gaiq ndok mbouj ndat lo, gou gaem hwnjdaeuj couh ngaux. Yi, noh gwnz ndok lij mbouj siengj lizhai? Gou bak ngaux fwngz beng, beng haujlai nanz cij gwnz daengz noh, doeklaeng noh saek gehheuj lo. Gou youh aeu fwngz bae yaek heuj, yaek haujlai nanz cij dawz noh yaek okdaeuj. Daxboh youh riu lo, naeuz: “Henx ndok aeu miz naihsim, aeu cug di cug di henx, baenzlawz ndaej gwn gaemz ndeu couh bienqbaenz bouxbiz ne?”

Gou dingq vah daxboh le, menhmenh cimz, baez di baez di haeb. Gvaq yaep ndeu, gou dawz geij gaiq ndok henx ndaej seuqsatsat, lienz ndokngviz hix vat okdaeuj cup gwn lo……

Mbouj yungh gangj, gwn ndokmou geijlai feih ha! Hoeng, gou mbouj nyinhnaeuz henx ndok dwg gienh saeh genjdanh ndeu, ndawde miz siengjfap, miz goengfou, mboujne, gyoengqvunz vih gijmaz aeu gangj aen cingsaenz henx ndok ne!

(bouxlauxsae son’gyauq Veiz Gyanghbingz)