Banhaemh yaek ninz seiz, baez gven daeng, henz rwz cienz daeuj sing yiengj“nge nge nge”, geij duz nyungz “ciengqgo” mbouj dingz，dingq dwk simfanz hoz- bongz, gou caeuq dahcej din fwngz cungj deng duznyungz haeb geij giz, humz yaek dai, dou hozndat raixcaix, gietdingh mbouj gaeb sat gij nyungz neix mbouj ninz.

Gaeb nyungz hainduj lo, gou caeuq dahcej byaengq hung song da, hoeng duznyungz lumj caeuq dou guh yahndoj nei, yaek ra seiz ngaeuz hix mbouj raen. Sawqmwh, yawjraen duz nyungz he douh youq laj riep, haha, dauqdaej deng gou fatyienh lo, yawj mwngz buet bae gizlawz, gou laeglemx gvaqbae, menhmenh iet song fwngz, yungh rengz baez bek, hwhw, wnggai deng gou bek dai luba, gou mbe song fwngz baez yawj, mbouj miz saek yiengh, duznyungz deuz bae lo. Yawjyawj dahcej, de gaenq gaeb ndaej song duz lo. Dahcej naeuz：“Mwngz yawjraen duznyungz, gaej gip, menhmenh iet fwngz bae bek, mwh bek aeu vaiq、cinj. ”

Gou dingq le, youh bae ra duznyungz, aiqdwg deng dou hwk lau lo, ra le haujlai nanz cungj mbouj raen saek duz, gou gangj:“Wnggai dwg mbouj miz luba.” Dahcej ngauzngauz gyaeuj naeuz:“Mbouj, mbouj, seizneix mwngz bae gven daeng.” Gven daeng mbouj yaep he, caen dahraix, gij sing “nge nge nge ”youh yiengj lo, gou sikhaek bae hai daeng, hwhw, song duz nyungz bizbwd douh youq gwnz dingjriep, baezneix gou itdingh gaemh dawz de, gou ciuq gij fuengfap dahcej gangj haenx, laeglemx gvaqbae, heiq hix mbouj gamj ok, iet fwngz baez bek, hahaha, song duz nyungz gwn ndaej imq lai, mbin mbouj ndaej, deng bek ndaej yungzywdywd. Ciuq gij banhfap yienghneix, gou caeuq dahcej dawz gij nyungz ndaw riep cungj siumied liux lo.

Yienzlaiz gaeb nyungz hix aeu gangj fuengfap, guh gijmaz saeh cungj lujlaj mbouj ndaej.

(bouxlauxsae son’gyauq

Luz Canghungz)