Yawj, laeq lwgnyez youq gwnz dieg ruenz haenx, dwg daegnuengx bouxlawz ne? De couhdwg daegnuengx gou, seizneix cij ndaej 11 ndwen. Naeng- noh hausagsag, yawj yienghde gig caemcingx. Doiq lwgda lumj song aen makit yienghneix ndaemndwt, aenndaeng mbouj hung hix mbouj iq, hoeng, aen- gyaeuj de daegbied hung, ndigah, gou an aen vamingz heuhguh “daeggyaeujhung” hawj de.

“Daeggyaeujhung” yienznaeuz yawj hwnjbae vunz gig dingh, hoeng, de cix ak doengh raixcaix. Miz baez ndeu gyanghwnz, gou gaenq ninzndaek, “daeggyaeujhung” cix ndiu lo, de benz hwnj gwnz ndang gou daeuj, aeu cik fwngz he va aennaj gou, lingh cik fwngz beng bak gou, myaiz lij ndik gwnz aenndaeng gou dem, gou sikhaek ndiu lo, couh nyoengx de gvaq mbiengj ndeu bae, hoeng, “daeggyaeujhung” cix riugwkgwk, lij beng lingxbuh gou maenhnwt mbouj cuengq, lumjbaenz heuh gou vaiq di hwnqdaeuj caeuq de guhcaemz. “Daeg- gyaeujhung” ha, gouz mwngz cuengq gvaq daeggo ba, daeggo ngoenzcog lij bae hwnjhag ne!

“Daeggyaeujhung” yienghyiengh cungj raen mizyinx, cijaeu dwg gij doxgaiq de caengz raen gvaq haenx, de cungj roxnyinh gig geizheih. Geiq ndaej miz baez ndeu, gou daiq “daeggyaeujhung” bae ndaw rug vuenh vaqnyouh seiz, de yawjraen denfunghsan cienqfofo, couh angq ndaej “w, w ” hemq mbouj dingz, de vix gou, youh vix denfungh- san, lumjbaenz heuh gou daiq de bae loengh denfunghsan nei.

“Daeggyaeujhung” riu hwnjdaeuj couh engq mizyinx lo. Sing riu de gig hung gig gok, baez riu couh loh’ok song diuz heujnaj hung, myaiz rih- byoegbyoeg. De yawj gyoengq mehbaj diuqfoux seiz, de hix diuq mbouj dingz, lij riuww dwk bekfwngz dem! Danghnaeuz mwngz umj de, de riu seiz lij aeu song fwngz bek najaek mwngz ne!

Baenzlawz yiengh? Daegnuengx gou ——“daeggyaeujhung” dwggyaez lwi? Gou caen maq- muengh “daeggyaeujhung” vaiq di majhung, yienghneix, couh ndaej caeuq gou bae guh haujlai saeh mizyinx lo.

(lauxsae son’gyauq Cinz Hungzmeiz)