Cinz lauxsae aennaj luenzlulu, doiq da youh hung youh rongh, de gig gyaez riu, yawj hwnjbae hozraez unqswnh, hoeng mizseiz hix gig yiemzlaeh.

Cinz lauxsae son dou gaenq 5 bi lo, youq ndaw yaenqsiengq gou, de couh- dwg cihsiz lai, gig gyaez hong swhgeij.

Gou mbeiiq, mbouj gamj yaengx- fwngz hoizdap vwndiz, lauxsae heuh gou hoizdap vwndiz gou couh ndang saenz ndaej gangj mbouj ok vah. Doeklaeng lauxsae fatyienh gou cungj cingzgvang neix le, couh ra gou damzsim, bang gou ra yienzaen, laeb saenqsim.

Gvaqlaeng, Cinz lauxsae hwnj- dangz seiz, cungj gujli gou hoizdap vwndiz, mwh gou dap ndaej doiq seiz, de couh doiq gou riunyumj haenh gou; gou dap mbouj doiq seiz, de couh unqswnh naeuz：“Mbouj youqgaenj, loek le couh lingh daeuj, mwngz miz yawjfap swhgeij, gangjmingz mwngz gaenq doengh uk lo. ”

Dou gig gyaez dingq Cinz lauxsae hwnjdangz, moix baez de hwnjdangz, cungj dawz govwnz gangj ndaej gig sengdoengh, mizsing mizsaek, de ciengzseiz dawz govwnz neiyungz caeuq gwndaenj raeuz lienz hwnjdaeuj, lij gangj di coenzvah boux mizmingz, roxnaeuz doeg sei Dangzcauz swz Sung- cauz, de doiq dou naeuz: “Seiziq mbouj roengzrengz, lauxgeq hoengqndwi cix siengsim.” Gangjdaengz gikdoengh seiz, lij din dik fwngz vad, dou dingq ndaej cungj ngaez lo.

Cinz lauxsae lij gvansim gwndaenj dou. Geiq ndaej miz baez ndeu, de baenzbingh lo, dungxin ndaej hojsouh, cuengqhag le, de lij youq hagdangz yawj dou gwn ngaiz, gyoengq doengzhag gig yousim de, cungj heuh de baema yietnaiq. Hoeng, Cinz lauxsae gangj yawj dou gwn ngaiz ndei le, de cij cuengqsim ma ranz.

Cinz lauxsae caen dwg boux lauxsae ndei ndeu ha! De dungxcaiz lai, gvansim hagseng, cingq aenvih miz lauxsae ndei yienghneix son, cingzcik yijvwnz ban dou cij cinbu ndaej yienghneix vaiq, ban dou geizgeiz cungj ndaej youhsiu.

Cinz lauxsae, dou ciengxlwenx gyaez mwngz, ciengxlwenx mbouj lumz mwngz!

(boux lauxsae son’gyauq Cinz Hungzmeiz)