Ngoenz gyanghaet mbwn’gvengq ndit rongh ndeu, lwggaeq yawj daengngoenz gwnz gyaeuj ronghsagsag, gikgyatgyat naeuz: “Ngoenzneix daengngoenz gig ndei, gou yaek ndeindei dak ndit.”

Lwggaeq ninz youq gwnz diegnywj, cingq dak ndit raeujrubrub. Sawqmwh dingqnyi sing lwgmou naeuz: “Lwggaeq, gaej dak ndit lo, vaiq daeuj bang gou caep ranz ba.”

Lwggaeq naeuz: “Mbouj guh mbouj guh, caep ranz youh baeg youh uq, gou lij dak ndit ne.”

“Mwngz lwg gik neix!” Lwgmou damzbwdbwd byaij bae lo.

“Lwggaeq, vaiq daeuj bang gou muz mienh ba.” Youq giz mbouj gyae, lwgbit heuh de.

Lwggaeq naeuz: “Mbouj guh mbouj guh, muz mienh gyanq lai, gou cingq dak ndit ne.”

“Mwngz lwg cabheiq neix!” Lwgbit itmienh nyoengx aenmuz itmienh naeuz.

Gyanghaemh, sawqmwh doek fwnhung lo, lwggaeq dawz doengj dawz bat daeuj coux fwn, lwgmou caeuq lwgbit yawjraen le, ganjvaiq bang lwggaeq coih aenranz ndei.

Lwggaeq yawj aenranz coih ndei de, caiq yawjyawj lwgmou caeuq lwgbit daengx ndang dumz liux, mbouj ndei eiqseiq ngaem gyaeuj roengzdaeuj lo.

Lwgmou naeuz: “Daihgya doxbang dwg wnggai hane.”

Seizde, aennaj lwggaeq ndingyanyan, lumj aen makbingzgoj nding’yan nei. (sam nienzgaep Lij Yez)