Gou ya, miz cungj gyaez ndeu, de couhdwg ndaem va.

Song fwngz lingzgiuj gou ciengzseiz uq namh, byoemgyaeuj ndaemndat gou ciengzseiz deng raemxhanh cimq dumz, gawq vah ndeu ciengz youq henz bak: “Aeu doegsaw! Saedceij hix yaek gvaq ndei!”

Gou doiq saedceij gig miz yiedcingz, cungj gyaez ndaem di va di nywj. Suenva gou——Gaiq diegfwz daxgoeng mbouj ndaem gomiuz ndeu. Seizneix cungqgyang ndaw suenva go mauxdan ndeu cingq ndiengqndet ngiengxgyaeuj doxhwnj; henz- bangx go’ndwenndwennding hix hag yiengh gomauxdan, hoeng de deng 30 lai duj va at ndaej hwet gungj lo, caeklaiq gou cengj diuz dwngx ndeu daeux de! Vacuhdanhhungz hai va nga youh nga, vafunghyijlanz hoengzmaeq youq henz dak de, va’gut ngeng naj caemsiengj, vamaedlaeh hai ndaej hausagsag, va’gyangzveih baij yienghceij ……Ndaw suenva gyaeundei raixcaix, gij goengrengz gou cungj suenq mbouj begfeiq ha!

Vih aen suenva gou engq gyaeundei, gou hwnj muengx bae caz swhliu, gou cauxok cungj bwnh ndeu——bwnhnaengmak. Mwh gou gwn makbwz- yanghgoj, comz naeng de; vunz ranz gwn gvehoengz seiz, gou sou naeng gvehoengz hwnjdaeuj faeg soiq bae. Daxboh raen gou yienghneix, gamjdaengz gig geizgvaiq, daxmeh hix mbouj lijgaij. Gou doiq gyoengqde riu naeuz: “Hihi, gou dawz bae gueng gaeq hane!” Gangj sat ndonj haeuj suenva iq bae lo, dawz gijde oemq haeuj goek va bae. Vihliux rom bwnh, bingzseiz, lienz daxmeh baek yw lw gij nyaqyw haenx hix mbouj cuengq gvaq, cungj dawz bae oemq laj goek gova lo. Caemhcaiq, gou lij bae henz mbanj gvej goging go’ngaih ma oemq dem! Ginggvaq geij ndwen seizgan saeqsim dajleix, gij va hai ndaej engq ronghsien gyaeundei lo. Gou dajsuenq caux aen suenva mbouj yungh vafeiz, cienz dwg yungh bwnhranz daeuj dwk va ndeu. Gou engq gaenx bae rom bwnh lo, gijmaz rebfaex ha, mbaw loenq ha, byakduh ha……gou cungj dawz de guh bauj.

Baez ndaej hoengq, gou couh ndonj haeuj suenva bae rwed raemx, dwk bwnh, gaeb non. Gova engq noengq lo, gogo mwncup cangqcwt, seiq geiq longz heu daenj hoengz, yinx daeuj baenz bang baenz gyoengq duzrwi duzmbaj ciengqgo diuqfoux. Gou yawjsaw baeg le, couh daiq daegnuengx bae suenva guhcaemz, simvuen raixcaix. Ngoenzsingh- giz, gou iu doengzdoih daeuj yawj va, gyoengqde gig hozhaenz, danqhaenh mbouj dingz naeuz: “Va! Gij va geijlai lengj ha! Caen ha, mwngz baenz dahsien va lo.” Gou dingq le, ndawsim diemzsisi.

Va hai lumj man, hoengzhoengz loegloeg, gou angq ndaej song mbiengj gemjnaj hix hai ok song duj vamaeq daeuj lo.

(boux lauxsae son’gyauq Cinz Cinhdonz)