Gou miz aen cung dwggyaez ndeu, dwg gou gvaq cib bi ngoenzseng seiz daxmeh soengq hawj gou. Gij yienghceij de dwg boux dahsau iq gwnz gyaeuj miz duz mbungqmbaj ndeu, dwggyaez lai lo. Moix ngoenz gou dingh ndei seizgan, naenx duzmbungqmbaj mbat ndeu, baez daengz seizgan, de couh singgok heuh dwk: “Siuj baengzyoux, vaiq hwnqmbonq, vaiq hwnqmbonq.” Baez dingq singhemq, gou sikhaek ndiu gvaqdaeuj, yienghneix, hwnjhag、guhsaeh, gou cungj mbouj gvaiz gvaq.

Gou gyaez aen cung neix, aenvih de moix ngoenz cungj nyinhcaen guhhong, mbouj gik gvaq.

Yawj, youq gwnz cung, cimdiemjcung、cimfaencung、cim- miuxcung mbouj dingz dwk byaij baenaj, couh lumj sam beixnuengx nei. Lauxsam cimmiuxcung beizheiq miz di gip, buet ndaej ceiq vaiq, de buet le gien ndeu, lauxngeih cimfaencung cij nod ndaej gek iq ndeu; caj lauxngeih sinsin hojhoj buet le gien ndeu, daeggo cimdiemjcung cij byaij ndaej gek hung ndeu. Hoeng gyoengqde gaenjmaed boiqhab, coengzlaiz mbouj baij goenglauz swhgeij, vihliux gunghcoz, vihliux bouxcawj, gyoengqde doxgiet doxndei.

Aencung buenx gou gvaq le haujlai nanz, geiq ndaej miz baez he, aenvih ngoenz daihngeih gou yaek bae hagdangz baet gyausiz, gou yaek hwnq caeux di, hoeng, gou ninz gvaq seizgan lo, mwh aencung yiengj baez daihsam gou cij ndiu, gou sikhaek hwnqmbonq, vaiqvet daenj buhvaq cat heuj swiq naj, buet bae hagdangz, caeklaiq miz aen cung dwggyaez neix, ngoenzhaenx gou cij mbouj daengz gvaiz, gou engq gyaez aen cung dwggyaez neix lo.

Aen cung dwggyaez neix, hawj gou rox ndaej aen dauhleix“conq seizgan conq gim, conq gim nanz cwx conq seizgan”neix. Daj seizneix hwnj, gou engqgya insik seizgan, dawz saehcingz guh ndaej engq ndei.

(lauxsae son’gyauq Couh Veijcangj)