Ndwensam, daihdeih heusausau, gofaex did ok ngazoiq youh heu youh mwn. Gvangjsih Bouxcuengh Swcigih couxdaeuj aenciet angqyangz —— sam nyied sam.

Sam nyied sam dwg ngoenzciet conzdungj Bouxcuengh, ngoenzde Mbanjcuengh ranzranz cungj guh haeuxnaengj haj saek. Gij saek haeuxnaengj ronghsien ndeiyawj de, miz hau、henj、hoengz、gyaemq、ndaem haj saek. Gij saek haeuxnaengj dwg aeu mbaw caeuq va doenghgo daeuj nyumx baenz, miz mbawraeu、go’gyaemq、vamai daengj. Haeux- naengj haj saek guhfap gig genjdanh, baez hag couh rox. Mbawraeu dwg yienghneix guh, dawz mbawraeu swiq seuq, daem mienz le ciemq raemx song sam ngoenz, caiq dawz gij raemx de daeuj cimq haeuxcid gvaq hwnz, ngoenz daihngeih lauz haeuxcid hwnj, ndik raemx hawq le caiq cuengq roengz ndaw caengq bae naengj, naengj ndei le, haeuxnaengj couh bienq ndaemndwtndwt. Go- gyaemq miz saeknding saekgyaemq song cungj, go’gyaemq caeuq vamai ityiengh, swiq seuq le dawz daeuj cawj raemx, gij saek de cawj okdaeuj le, daih aeu gij raemx de daeuj cimq haeuxcid gvaq hwnz, ngoenz daihngeih lauz hwnj ndik raemx le caiq naengj. Yienghneix haeuxnaengj haj saek couh guh baenz lo.

Haeuxnaengj haj saek mbouj dan ndeiyawj, lij gig hom gig ndeigwn. Mwh lij youq ndaw caengq naengj, gij heiqhom couh hawj vunz myaiz doekyagyag. Cawj cug le hai aen facaengq, cij raen gij haeuxnaengj wenjrongh unqnemnem, homfwdfwd, hawj mwngz gwn gaemz youh siengj gaemz, dingz mbouj roengzdaeuj. Gwn gvaq haeuxnaengj Boux- cuengh, imq youq ndaw dungx, hom youq ndaw sim, sawj mwngz roxnyinh gwndaenj couh lumj haeuxnaengj haj saek ityiengh gyaeundei dangq- maz!

Ciet sam nyied sam Bouxcuengh raeuz cawz le guh haeuxnaengj, lij guhcaemz ciengj bauqva、dwkdom、eufwen、dwklongj …… nauhyied lai lo !

Sam nyied sam dwg aen ciet ceiq nauhyied Bouxcuengh Guengjsae, angqcoux mwngz sam nyied sam daengz ranzmbanj Bouxcuengh daeuj guhhek!

(boux lauxsae son’gyauq Vangz Gveiyangh)