Rumzbaek nitsisi cioo baenz- ngoenz baenzhwnz bae, sing yak nyi lai, hawj vunz nyi le simgyap lai, raq rumzbaek dwgcaengz neix ok gizlawz daeuj ne?

Boh naeuz, rumzbaek ok baih- baek gyae’gyanggyang de daeuj, rumzbaek ak lai manz lai, ciengzseiz hawj fawhnit baihbaek caembyam- byam bae, mongmumu bae.

Rumzbaek mbouj gyaez mbaw- faex heuswdswd nauq,

Rumzbaek mbouj gyaez dujva gyaeundei nauq,

Rumzbaek mbouj gyaez garij yiengj dinghdungh nauq,

Rumzbaek mbouj gyaez duzroeg angqvauvau mbinfiufiu guhfwen nauq.

De ginggvaq ndoengfaex, couh sik mbawfaex heuswdswd bae liux,

De ginggvaq gadah garij, couh aeu nae goemq haeuj gij singyiengj dinghdungh bae,

De mbouj hawj gyangdoengh miz va hailangh nauq,

Nit daengz duzroeg ndoj youq ndaw rongz, roxnaeuz laeh gyoengqde bae dieggyae youq……

Rumzbaek ak baenzneix manz baenzneix, guhlawz baez daengz gizneix, baez daengz Byalaux Cibfanh raeuz gizneix, couh baenz- ngoenz baenzhwnz hemqoo lumj daejnga’nga nei? Guhlawz lumj duz mayak deng vunz aeu faexgyaengh moeb, youh lau, youh haemz, youh yup, youh sim mbouj nyied, geb diuz rieng gongzoo?

Rumzbaek goj sim mbouj nyied dwg lwi? Hozndat lai dwg lwi? Lau lai dwg lwi? Mwngz yawj, youq gizneix, youq Byalaux Cibfanh gizneix——

Bouxboux cungj mbouj lau rumzbaek ak lai,

Bouxboux cungj mbouj lau rumzbaek manz lai,

Bouxboux cungj mbouj leix- langh rumzbaek angq mbouj angq,

Gofaex cungj ciuqyiengh nauh- nauh yiedyied iet mbawfaex heu- swdswd de,

Dujva cungj ciuqyiengh angq- fwngfwng hailangh rim gwnz bo gwnz bya,

Duzroeg cungj ciuqyiengh angqvauvau mbinfiufiu guhfwen,

Garij gadah cungj ciuqyiengh yiengjdinghdungh, lae bae giz- gyae……

Byalaux Cibfanh maenh’ak raeuz, doenghgij rumzbaek ak lai manz lai de, youq gizneix goj mbouj gamj angj ak!

Byalaux Cibfanh gyaeundei dwggyaez raeuz, bi daengz rieng, angqfaengz nauhyied, ronghrangh youh saek lai gyaeundei.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）