Duzndaem、duzhau、duzraiz dwg sam duz meuz iq dwggyaez, gyoengqde dwg baengzyoux ndei, ciengzseiz youq doxcaez guhcaemz.

Miz ngoenz ndeu, gyoengqde doxcaez bae henz dah epbya. Byaij ha byai ha, sawqmwh, duz nou ndeu daj baihnaj gyoengqde buet gvaqbae, ndonj haeuj aencongh henz loh bae, diuzrieng lij loh youq baihrog binengneng, lumj cingq naeuz: “Sou miz bonjsaeh daeuj gaeb gou vei!”

Sam boux baengzyoux mwngz yawjyawj gou, gou yawjyawj mwngz, cungj siengj baenzlawz cijndaej gaebdawz duz nouyak neix ne?

Duz meuzraiz yawjyawj fagcax ndaw fwngz, ndawsim siengj: Gou aeu fagcax raemj diuzrieng duznou goenq bae, duznou itdingh in ndaej buet okdaeuj. Yienghneix de doiq song boux baengzyoux naeuz: “Sou byaij gvaq henz bae, yawj gou baenzlawz gaeb duznou.” De laeglemx byaij gvaqbae, yaengx fagcax hwnj, yungh rengz raemj roengzbae…… Hojsik ceiz lo, duznou ndonj haeuj congh bae, diuzrieng mbouj raen lo.

Meuzhau ndwn youq henz gip lo, ndawsim siengj: Gou yungh faexset gyaep duznou okdaeuj, caiq moeb duznou dai bae. Yienghneix de naeuz: “Sou yawj gou.” De dawz faexset iet haeuj ndaw congh bae, hoeng, duznou ndaw congh dawz faexset hab raek lo, hix mbouj gyaep ndaej duznou okdaeuj.

Meuzndaem fwt siengj ok aen banhfap ndeu, vaiqvet buet daengz henz dah, riuj doengj raemx ndeu dauqma. “Nyiengh mbat he, hawj gou daeuj.” Meuzndaem naeuz. Yienghneix meuzndaem dawz doengj raemx raix haeuj ndaw congh bae, dahraix, gyoengq nou dumzsubsub ndeu daj ndaw congh buet okdaeuj lo, “Duz ndeu, song duz, sam duz……” Sam boux baengzyoux doxcaez yat hwnjbae, gaeb dawz duznou ceiq hung de.

Meuzhau caeuq meuzraiz cungj yaengx mehfwngz coh meuzndaem.

(hajnienzgaep Goj Sinhleiz)