2019 nienz 4 nyied 8 hauh singhgiz it ok ndit

Ngoenzneix, Leiz lauxsae yaeuj aen batvax ndeu daeuj cuengq youq gakciengz henz gyangjdaiz, yaek hawj dou youq ndaw ban guh duhngaz, dou sim’angq ndaej diuq hwnjdaeuj!

Leiz lauxsae youq henz son, dou dawz duhhenj swiq seuq le, cuengq haeuj ndaw bat bae, youh gya di raemxsaw, doeklaeng aeu gaiq baengzsa hau goemq baihgwnz. Leiz lauxsae gangj, yienghneix dawz duhhenj cimq seiq haj diemj cung le vuenh baez raemx ndeu, baezlaeng ngoenz vuenh baez raemx ndeu, couh ndaej maj ok duhngaz lo. Dou maqmuengh dwk.

2019 nienz 4 nyied 10 hauh singhgiz sam fwj lai

Gyanghaet, gou gig caeux couh daeuj ndaw ban cazyawj duhhenj bienqvaq. Gou fatyienh moix naed duh cungj bienq “biz” haujlai, miz mbangj cungj dawz naeng ciengq vaih lo, miz mbangj lij did ok ngaz iq ne! Gou gig sim’angq dawz gienh saeh neix lwnh hawj gyoengqdoih dingq.

2019 nienz 4 nyied 11 hauh singhgiz seiq mbwn’gvengq

Caeuq ngoenzlwenz ityiengh, gou youh caeuxcaeux buet haeuj gyausiz bae yawj duhngaz lo. Yo, hwnz seizgan ndeu, gij ngaz iq gingqyienz maj ok diuzdiuz rieng iq lo, lumj baenz duz baenz duz duzrug iq nei. Naedduh luenzlulu、bizbwdbwd, gij byak mbang- mbimbi gaenq bokliz naedduh lo, lumj duzbid bok- naeng ityiengh, geijlai mizyinx ha!

2019 nienz 4 nyied 12 hauh singhgiz haj ndithaenq

Ngoenzneix, Leiz lauxsae dawz aen batvax daeuj hawj dou cazyawj, dou gvaengz baenz gvaengz ndeu, ceng dawz aen’gyaeuj iet ndaw bae yawj: Ho, “diuzrieng” iq naedduh gaenq maj baenz “diuzrieng” hung noengqndwtndwt lo! Bonjlaiz di duh ndeu, seizneix gaenq bienqbaenz bat duhngaz rim ndeu lo. Doengh gij duhngaz neix youh hau youh biz, gou caenx mwngz, mwngz caenx gou, limqduh couh lumj aen- gyaeuj iq ityiengh oengjcoengh coh baihgwnz. Leiz lauxsae aeu fwngz lumhlumh aen’gyaeuj dou, riu naeuz: “Geijlai lumj aen’gyaeuj iq sou ha!” Coenz vah ndeu daeuq ndaej daihgya riuhaha……

(boux lauxsae son’gyauq Lij Sunghlinz)