Gyanghaet seizcou, rumzliengz cififi, singzdoenghduz sawqmwh nauhyied hauj- lai——ngoenzneix yozyen doenghduz ciusou hagseng lo!

Aen canghaeux nyaenma iq Beibei caeuq daxmeh youq de doi rim byaek mak, ndaw hoengheiq mbin miz feih diemzsub. Daxmeh youq ndaw ranzdajcawj nyaengq dwk, Beibei youq henz loengh aen feihgih iq. Seizde, bohlwg duzyungzmauh daj rog cueng byaij gvaq, duzyungzmauh iq raek aen daehsaw hung he. Daxmeh nyaenma sawqmwh siengj hwnj ngoenzneix dwg ngoenz yozyen doenghduz hagseng moq bauqmingz, ganjvaiq heuh Beibei bae bauqmingz.

Giz hagseng moq bauqmingz vunz lai vunz daih, Beibei baizdoih baiz haemq nanz le, dauqdaej baiz daengz de lo. Yaucangj yiengzbya baez yawjraen Beibei, aennaj riunyumj sikhaek bienqbaenz caepcat. Beibei byaij hwnjbae, goenggingq doiq yaucangj yiengzbya naeuz: “Yaucangj, gou heuh……”Yaucangj yiengzbya najlaep ciengj vah de naeuz: “Sou nyaenma daiq ganvad lo, ndigah……” “Ndigah mwngz mbouj sou gou, deng lwi?” Beibei cam. Yaucangj yiengzbya mbouj nanhfanz naeuz: “Deng lo, mwngz baema ba, baihlaeng lij miz vunz bw!”

Beibei naiqnuk byaij bae lo, de ngaem gyaeuj roengz, gwj byaij gwj byaij, cij dingqnyi “bung” sing ndeu, swx makcoengz he daj gwnz gyaqhuq sangrau doek roengz- daeuj, laxlawz dwg diuzrieng hung nyaenma iq nyex hux, bungqdeng doxgaiq bouqmak- coengz doek roengzdaeuj lo. Beibei sikhaek buetdeuz, de maqmuengh sikhaek maj ok gaiqfwed daeuj mbin deuz vaiqdi.

Hoeng ngamq buet yaep ndeu, Beibei sawqmwh siengj: Couhdwg aenvih gou cungj mbouj gamj mienhdoiq gij loek swhgeij, ndigah cij louz gij yinsieng mbouj ndei hawj daihgya, gou yaek gaij gij loek gou bae. Siengj daengz gijneix, de ganjvaiq buet dauqlaeng. Cingqngamj raen daxmeh nou- coengz cingq gip makcoengz, de naeuz: “Daxmeh noucoengz, dwg gou bungq doek gij makcoengz mwngz, hawj gou gip hwnjdaeuj ba!”

Gangj sat, Beibei sikhaek gungj ndang roengzdaeuj gip makcoengz, daxmeh nou- coengz naeuz: “Guh loek le rox cawjdoengh nyinhloek, caiq gaij ndei, lij lwg lwgnyez ndei!” Dingq daxmeh noucoengz baenzneix gangj le, nyaenma iq mbouj eiqseiq najnding lo. Daxmeh noucoengz sawqmwh siengj hwnj gijmaz, cam: “Nyaenma iq, mwngz ngoenz- neix dwg mbouj dwg bauqmingz hwnjhag ha?” Nyaenma iq doeknaiq han naeuz: “Hagdangz mbouj sou gou, naeuz dou nyaenma vaddaeuz lai!” Daxmeh noucoengz ganjvaiq nai de: “Mwngz baenzneix ndei, hagdangz itdingh sou mwngz, gaej siengsim!”

Gijneix cingqngamj hawj lauxsae duz- beuq lohgvaq haenx yawjraen lo. Lauxsae duzbeuq dwg boux lauxsae ndei gangjvah guhsaeh habcingz hableix ndeu, yawjraen gij cingzgingj neix, de gietdingh sou laeq lwgnyez roxsoq neix.

Ngoenz daihngeih, Beibei couh aemq aen daehsaw angqvauvau bae hagdangz lo.

(Yi Sinhsinh)