“Ronghndwen seizlawz hwnj, dawz laeuj cam gwnzmbwn”. Baez yaepda, ciet betnyied cibngux youh daeujdaengz lo, caeuq ciet betnyied cibngux bi’gvaq mbouj doengz dwg, bineix ngoenz cibngux caeuq ngoenz gozging caemh ngoenz ndeu, song ciet caez gvaq, caen angq lai lo ! Ndigah gou caeuq daxboh daxmeh itheij madaengz lajmbanj caeuq daxgoeng doxcomz gvaqciet.

Dou gwn donqcaeuz doxcomz sat le cingq dwg seiz mbwn ngamq laep, gou couh caeuq daxmeh itheij dawz aendaiz luenzhung ram hwnj gwnz dingjlaeuz bae, lij dawz gij daengq buen hwnjbae, baij ndei daizdaengq le, couh dawz mak、bingjronghndwen、yienglab daengj baij hwnj gwnz daiz, cunjbei caeq ronghndwen lo.

Mbwn ciemhciemh bienq laep, aen ronghndwen luenzlulu daj baih- doeng loh aennaj okdaeuj, lumj dahsau gyaeundei ndeu. Ronghndwen ronghsagsag venj youq gwnzmbwn, ciuqrongh daihdeih. Dou daengx ranz vunz comz youq henz daizluenz, diemj dawz yienglab, hainduj caeq rongh- ndwen. Cij raen daxgoeng song fwngz doxhab, ndaw bak nam naeuz: “Ronghndwen hung, ngoenzneix dwg ciet betnyied cibngux caeuq ciet gozging, baujyouh daengx ranz vunz gou ndangcangq, okhaeuj bingzan, gohaeux fungsou, ciengxduz cungj maj, seng’eiq hwngloengz, sou ndaej ngaenz lai. Baujyouh guekgya hwngvuengh bingzan, beksingq andingh……”

Gou dingq daxdoeng nam baenz- lai, ndawsim gig geizheih, hoeng lijdwg cibfaen goenggingq. Caeq sat ronghndwen, dou itheij gwn bingj- ronghndwen itheij gangjgoj, daxmeh gangj aengoj《Cangzngoz Buet Coh Ronghndwen》hawj gou dingq, Cangz- ngoz ndaw gojgaeq hawj gou siengj ndaej haujlai, aensim gou mbin daengz gwnz ronghndwen bae, caen siengj bae yawjyawj gwnz ronghndwen miz mbouj miz gvangjhanzgungh, miz mbouj miz Cangzngoz, miz mbouj miz Vuzgangh cingq raemj gofaexgviq, miz mbouj miz duzdouq cingq daemyw……

Dou gwn dwk gangj dwk, diuz goronghndwen he cienz gvaqdaeuj: “Betnyied cibngux ronghndwen luenz, gwn aen bingjluenz van youh hom. Ronghndwen luenzluenz vunz dox- comz, nyiedbingj homhom sim vuen- yungz!” Dwg ha, song ciet caez gvaq geijlai angq ha! Geijlai nanzlumz ha!

(lauxsae son’gyauq Vangz Gveiyangh)