Seizcin daengz lo, gyoengq duzroeg cungj angqvauvau guhfwen.

Roegdinghgeng vihmaz siliengz baenzneix, daej mbouj daengx mbouj duenh ne? Miz haujlai haemh gou loqfangzhwnz ndiu daeuj, lij ndaejnyi sing daej roegdinghgeng.

Ngoenzneix daxboh lwnh aengoj roegdinghgeng hawj gou dingq. Gou rox lo, roegdinghgeng ngeix ranzmbanj raixcaix, hoeng dauq ranz mbouj ndaej, aenvih miz vunz mbouj hawj de ma ranz.

Roegdinghgeng ha, mwngz gaej simnaiq lai. Daeuj ranz dou vei, daeuj caeuq dou caemh youq vei. Gou heuh daxboh guh aen roengq ndeu hawj mwngz, mwngz gyaez lwi? Langhnaeuz mwngz mbouj gyaez, gou couh youq gwnz faex baihnaj ranz guh aen rongz ndeu hawj mwngz, baenz lwi? Gizneix yienznaeuz mbouj dwg ranzmbanj gou, hoeng gou caeuq bohmeh youq gizneix cungj gvaq ndaej vuenyungz dangqmaz. Daeuj vei, daeuj ranz gou vei, daeuj ranz gou mwngz couh angqfaengz lai lwgo.

Roegdinghgeng ha, mwngz gaej daej lo. Gou lwnh mwngz dingq bw, mwh gou ngamq daj Namzningz daeuj daengz ndaw lueg neix, gou goj daejnga’nga yaek dauqbae ranz. Daxboh naeuz, gizneix couhdwg ranz raeuz lwgo. Gou lij daej dem, naeuz gizneix mbouj ndei. Daxboh naeuz, youq ndaw guekcoj raeuz youq, mboujguenj dwg youq gizlawz, cungj vuenyungz. Youq gizlawz cungj ndei, mboujguenj youq gizlawz, ndawsim gyaez couh raen ndei. Coenzvah daxboh naeuz ndaej deng bw, seizneix, gou gyaez gizneix dahraix, gou raen gizneix ndei raixcaix. Ndoengfaex gwnz bya heuswdswd, gadah laj bya sawdikdik, gizgiz cungj miz va gyaeundei hailangh.

Roegdinghgeng ha, gaej simnaiq lai. Miz vunz mbouj hawj mwngz bae ranz, hoeng, bouxlawz gimq ndaej mwngz ndawsim gyaez bya gizneix, raemx gizneix, va gizneix, faex gizneix ne?

Roegdinghgeng ha, gaej simnaiq lai. Daeuj caeuq dou caemh youq vei, daeuj caeuq dou caemh gyaez gizneix vei! Yienghneix, mwngz goj rox angqvauvau guhfwen lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）