Youq ndaw ndoenggoraeu daengngoenz ciuq de, gou ciengq go dwk, laep da hwnj, dingq sing din caij mbawraeu fat ok haenx. “Ca ca ca……”lumj fwn seizcin yaengyaeng doek roengzdaeuj, lumj nonsei gwn mbawsangh, lumj raemx lae gwnz rin, dingq gij sing baenz- neix ndeidingq, saedcaih dwg cungj yiengjsouh ndeu ha! Raq rumzcou liengzsi ndeu ci gvaq, mbawraeu geq mbouj sat de bibi buengqbuengq, yiengjcaca, lumj damzciengq diuzgo haenh seiz- cou, youh lumj bekfwngz angq- coux gou nei.

Yawj, baenz go baenz go raeunding, geijlai lumj feizmbaw dawzyubyub, youh geijlai lumj fwjhaemh gyaeundei gwnzmbwn doek roengz gizneix. Gyoengqde nding dwk daegbied rongh, daegbied lwenqda, vaq baenz raq heiq raeujrub he, itcig lae haeuj ndawsim gou. Cingq youq gou siengj ndaej haeujmaez, mbaw raeu daegbied gyaqciq he biek nyeqfaex de douh haemq nanz de, daj gyangmbwn mbin- fengfeng doek roengzdaeuj, geij- lai lumj duzmbungqmbaj nding cingq mbaeumbeng mbinfoux ha! Gou angqvau siengj dwk: Mbawraeu lumj hotsei lumj mbawveh, de daihgaiq dwg dahsau seizcou sij saenqgyo- mbaiq hawj daxmeh daihdeih ba!

Mwh gou cingq siengjgyae, youh miz mbaw raeu ndingyanz he doek youq henz din gou. De beij mbaw haxbaenh hung di, lumj fajfwngz nei, moix “lwg- fwngz” cungj dwg soemsusu, youh lumj diuzrieng byagim nei. Sijsaeq yawj, raeb mbaw- raeu miz di heu, caeuq mbiengj- naj ndingyanyan doxbeij, gij nding couh engq nding lo. Bien moix “lwgfwngz” lumj faggawq nei, hawj mbawraeu bienq ndaej engqgya gyaeundei sawj vunz gyaez……

Mbaw ndeu rox seizcou, hoeng gou roxnyinh, mbaw ndeu engq rox langman. Neix hix sawj gou engqgya maqmuengh ndaej ngonzyawj mbawraeu engq gyaeundei binaj……

(haj nienzgaep Gu Couhyenz)