Gyanghaemh ndaw ndoengfaex, gij rongh ronghndwen myoxmyad. Duzgvi iq boemz youq henz daemz, gag siengj: “Ai, danghnaeuz gou miz aenrwz lumj duzdouq nei lingzsingj, gaiqga lumj maxloeg nei raezrangh, aenndang lumj duzlingz nei riengjret couh ndei lo……”

Cingqngamj, laj rongh rongh- ndwen byaij daeuj duz maxloeg ndeu. Duzgvi iq ganjvaiq ngiengx gyaeuj hwnj cam: “Dahcej maxloeg, vihmaz ga gou youh co youh dinj, gyap gwnz laeng youh naek youh geng ne?” Dahcej maxloeg lumj yawj rox gij siengjfap duzgvi iq nei, couh doiq de naeuz:“Byaij, gou daiq mwngz bae youzbyaij.” Duzgvi iq angqvauvau benz hwnj gwnz laeng dahcej maxloeg bae.

Songde byaij ha byaij ha, daeuj daengz ndaw ndoengfaex raemhrwd. Dahcej maxloeg gig miz eiqsei dwk cam: “Mwngz rox gij faex neix maj miz geijlai bi luma?” Duzgvi iq yawj ganj- faex hunghwd han: “Wnggai miz bak lai bi luba.” Dahcej maxloeg ngaekngaek gyaeuj, lwnh duzgvi iq naeuz: “Deng. Hoeng sou duzgvi dwg doenghduzraih souhmingh ceiq raez, lix ndaej mbouj beij gij faex neix dinj.” Duzgvi iq gag siengj: Laxlawz gou baenzneix ak!

Songde byaij ha byaij ha, byaij daengz henz diuz dah raemx lae gig haenq he. Dahcej maxloeg doiq duzgvi iq naeuz: “Yienznaeuz dou youq gwnz dieg buet ndaej ak, hoeng youq ndaw raemx dou couh beij mbouj ndaej sou duzgvi, ndaem roengz daej raemx bae mbouj ndaej.” Duzgvi iq sim siengj: Laxlawz gou mbouj dwg boux mbouj miz saek yiengh ndei ndeu ha!

Songde byaij ha byaij ha, byaij daengz benq diegnywj heuyauyau he. Sawqmwh cienz daeuj sing cici caca, duzgvi iq deng hwk dwk dawz gyaeuj、din、rieng cungj suk haeuj ndaw gyap bae. Dahcej maxloeg raen le, riuhwhw naeuz: “Aengyap mwngz youh hung youh naek haenx yawj lumj dwg rap- naek, gizsaed dwg aenfa genggwt baujhoh mwngz. De ndaej bang mwngz swnhleih ndoj gvaq haujlai yungyiemj. Mboujgvaq haxbaenh cij dwg duzdouq he ginggvaq gizneix hane.” Gangj sat, songde doxcaez riuhaha.

Duzgvi iq nyaenx mbouj ndaej danqheiq naeuz: “Guh swhgeij caen ndei!”

(ngeih neinzgaep Cwnz Yijcingh)