Mwngz laihnaeuz mwngz mbeilaux lai ma, beixmbauq ha?

Mwngz mbeilaux——couh guhlawz mbouj bae ndaw ndoeng bae gaeb nouguk ciengzseiz daeuj gwn duzgaeq de ne?

Doenghgij nouguk ndoj youq ndaw lueglaeg dinbya de, rox baenzneix riu mwngz dahraix: Boux lwgnyez gaem lwgngaeuh de, mbouj gamj daeuj ndaw lueg ndaw ndoeng daeuj nauq; gaej yawj de ndaenggon lai, ndawsim couh lau gyoengqdou dahraix. Laeq lwgnyez mbeiiq neix!

Mwngz laihnaeuz mwngz ak lai ma? Beixmbauq ha.

Mwngz ak——couh guhlawz youq henz mbanj baebae daudauq, dan dwk duzroeg youq gyang nditndat guhfwen de ne?

Doenghgij ndoengfaex gyaez dingq duzroeg guhfwen de, caeuq doenghgij gova go’nywj ndaw ndoengfaex de, itdingh dwg yienghneix gangj mwngz: Boux lwgnyez gaem lwgngaeuh de, dan rox nyingzdwk duzroeg ndwi, hawj duzroeg lau dwk baenzngoenz cungj mbouj gamj guhfwen, yienghneix de couh ndaenggon dangqmaz lo. Laeq lwgnyez yakdoeg neix!

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）